400 çalakvanên mafên mirovan û xelatgirên nobelê yên li ser asta cîhanê, li dijî cezayê darvekirinê ku li girtiya siyasî ya bi navê Zehra Şehbaz Teberî hatiye birîn, daxuyaniyek dan û banga demildest betalkirina cezayê darvekirinê kirin.
Di daxuyaniyê de hate gotin ku bêyî amadebûna parêzeran û bi rêya online cezayê darvekirinê li Zehra Şehbaz Teberî hatiye birîn û bi sucên siyasî hatiye tawanbarkirin. Hate diyarkirin ku sedemê cezakirinê tenê ji ber hilgirtina tabloya ‘Jin, Jiyan, Azadî’ bûye.
Di dewama daxuyaniyê de hate ragihandin ku di 40 salên borî de desthilata Îranê cûdakariya zayendî ferz kiriye û bi hezaran girtiyên siyasî yên jin bidarve kiriye. Bi taybetî jî di komkujiya 1988’an a li Îranê de.
Di beşek din a daxuyaniyê de hatiye gotin: “Îran li ser asta cîhanê di nava welatên ku herî zêde cezayên darvekirinê li ser jinan pêk tîne de cih digre. Dosyaya Zehra Şehbaz Teberî wê yekê nîşan dide ku jinên li dijî zilma desthilatê radibin, rûbirûyê cezayên darvekirinê dibin. Lê jinan şoreşa ‘Jin, Jiyan, Azadî’ dan destpêkirin û pêşengtiyê ji berxwedana seranserî ya li dijî Zilmê re kirin û bêdeng nabin.”
Di dawiyê de jî banga demildest berdana Zehra Şehbaz Teberî hatiye kirin û daxwaz ji tevayî welatên cîhanê hat kirin ku piştgiriyê bidin têkoşîna jinên Rojhilatê Kurdistan û Îranê.
Zehra Şehbaz Teberî (67) endazyara elektrîkê ye, xelkê bajarê Reşte û li parêzgeha Gîlan rûdine. Roja 17’ê Nîsana 2025’an ji aliyê hêzên Îranê ve li mala wê bêyî biryara dadwer hat binçavkirin. Ji aliyê Şaxa Yek a Dadgeha Şoreşê ya bajarê Reşt ve cezayê darvekirinê lê hatiye birîn.
