Hevserokê Giştî yê Partiya Demokrasî û Wekheviyê ya Gelan (DEM Partî) Tûncer Bakirhan li Meclîsê di civîna koma xwe ya heftane de nirxandin kir.
Bakirhan ji ewil bal kişand ser 2’yemîn salvegera erdhejên 6’ê Sibatê yên Mereşê, kesên jiyana xwe ji dest dayin bi bîr anî û got ku berpirsyarê mirin û wêraniyê îktîara AKP-MHP’ê ye.
Bakirhan, bal kişand ser êrişên ser Çapemeniya Azad û got: “Hûn tevek Rojnameya Yenî Yaşamê, JINNEWS û Ajansa Mezopotamyayê (MA) dizanin; roj naçe ku zext li ser neyê kirin, roj naçe ku xebatkarên wan neyên binçavkirin. Hema hema her roj tên girtin. Em ê Çapemeniya Azad bi tenê nehêlin. Em van zextan lanet dikin. Dê piştevaniya me ya bi wan re bidome. Rexne, mafeke û welatê ku mafê rexnekirinê lê tune be li welatî demokrasî nabe.”
Bakirhan, bertek nîşanî tayînkirina qeyûm a li Şaredariya Sêrtê da û wiha got: “Vîna gelê Sêrtê di nîvşevekê de tune hate hesibandin. Tu dizî ji dizîna hêvî, ked û vîna gelekî mezintir nîne. Ev, bêwijdaniyeke mezin e. Hevşaredarên me ji bo hemû gelên li bajar bi awayeke wekhev xizmet kirin û proje pêş xistin. Di esasê xwe de ev xizmetên adilane hatin cezakirin. Banga min ji bo hemû gelên Tirkiyeyê ew e ku piştgiriyê bidin vê feraseta adilane, wekhevîparêz a Sêrtê. Bajarekî bifikirin ku ev 100 sal in bi qanûnên rewşa awarte ve tê birêvebirin. Em bang li îktîdarê dikin ku feraseta xwe ya ‘Kurd hene lê îradeya wan a siyasî tune ye’ biterikînin. Kurd hene û îradeya wan heye. Hûnê rêzê ji bo îradeya Kurdan bigirin.”
Bakirhan ragihand ku çareseriya aştiyane û demokratîk a pirsgirêka Kurd wê pêşengiyê ji pîvanên demokratîk ên li Tirkiyeyêr e bike û got, “Yanî çareseriya vê meseleyê wê bêhnê bîne ber her kesî. Birêz Ocalan dema ku şer kişand ser zemîna siyasî û hiqûqî, divê ziman û pratîka desthilatdariyê jî li gorî vê yekê be. Di vir de dixwazim hin mijaran bi bîr bixînim. Em ji tecrûbeyên cîhanê baş zanin ku di aştiyê de serweriya aliyan nabe, divê nebe. Aştî tê wateya avakirina edaleta civakî. Aştî bi pêlêkirina li stuyê gelê Kurd nabe.
Aştî di bin siya tundî, gef û şantajê de nabe. Aştî di bin ronahiya azadî û demokrasiyê de dikare bê avakirin. Dem ne dema bêdengbûyînê ye. Em hîn li benda çi bin? Hîn bila çend ciwanên me jiyana xwe ji dest bidin? Hîn bila çend milyar ji baronên şer re biçin? Em dipirsin. Divê tavilê ev bêne bidawîkirin.
Bakirhan bi dewamî got, “Ez dixwazim yekser ji desthilatdariyê bipirsim; hikumet di mijara demokrasî û serweriya hiqûqê de çima gavê neavêje, li benda çi ye? Di van mijarên bingehîn de ku daxwaza her kesî ye bila gavê biavêje. Çi desthilatdariyê disekinîne? Divê ev pirs bêne pirsîn.”
Bi domdarî Bakirhan ev tişt anî ziman: “Birêz Ocalan wê di demeke kin de bangawaziyeke dîrokî bike. Ez, mijareke ku raya giştî ya Tirkiyeyê û hûn jî zêde mereq dikin, cara ewil parve bikim. Birêz Ocalan, amadekariyan dike ku ji bo çareseriya mayinde ya pirsgirêka Kurd û avakirina Tirkiyeyê demokratîk, di nava çendek rojên pêş de bangawaziyeke dîrokî bike. Belê, birêz Ocalan amadekariya bangekî dîrokî dike û wê di demeke nêz de vê bangê bike.”
