Danê sibehê li salona Ramada ya li Silêmaniyê panela ‘Piştî salek pêvajoya aştiyê ya li Tirkiyeyê ber bi ku ve diçe?’ pêk hatibû. Piştî panela yekem, Parlementera DEM Partî ya Şirnexê Newroz Uysal, Wasiyê Rêber Apo û Parêzerê Buroya Sedsalê Mazlum Dînç têkildarî pêvajoya aştî û civaka demokratîk û pêşketinên girêdayî wê, civîneke çapemeniyê lidar xistin.
Di despêkê de Parlementer Newroz Uysal axivî û da diyarkirin ku niha di navbera dewleta Tirk û Kurdan de pêvajoyek girîng heye û got: “Ev pêvajo ji bo siberoja gelê Kurd, gelê Tirk û tevahiya Rojhilata Navîn bandorek xwe ya mezin heye. Ji bona wê her kar û pêngavek di vê çarçoveyê de bê kirin girîngî û bandorek xwe ya mezin heye.”
Newroz Uysal, di dewamê de got ku Rêber Apo ev 27 sal in bê rawestan ji bo gelê Kurd û gelên herêmê têkoşîn dike û got: “Lê tecrîd berdewame û ji bo vê çendê sinordarkirina serdan û hevdîtinên li gel Birêz Ocalan weke rêgiriyek li pêş pêvajoyê tê dîtin. Ev jî di demek de ye ku banga birêz Ocalan ya di 27’ê Sibatê de ta 26’ê Cotmehê de rêgiriyek berçav a li şer û rûbirûbûna çekdarî girtiye û bingehê qanûnî û siyasî amade kiriye.”
Newroz Uysal, da diyarkirin ku niha pêvajo ketiye qonaxa xwe ya duyem û pêngavên ku werin avêtin jî ji bo pêşketina pêvajoyê girîng in. Newroz Uysal got: “Pêwîste dewlet bi rêya komîsyonê erkê xwe bicih bîne û astengiyan derbas bike.”
Newroz Uysal, derbarê serdana komîsyona meclîsê ji bo Rêber Apo jî ev tişt gotin, “Heta niha komîsyonê ti biryarek ji bo serdana Îmraliyê nedaye. Em li bendê ne vê heftiyê komîsyon bi erka xwe rabe, civîna xwe pêk bîne û piştre jî serdana birêz Ocalan bike. Piştî wê jî wê rasterast lihevkirinên li ser bingehê despêkirina qonaxa duyem bipêşkevin.”
Derbarê erk û rola DEM Partî ya di vê pêvajoyê de jî Newroz Uysal got: “Xebatên DEM Partiyê cûr bi cûr in, bi rûniştin û serdanên ji bo Îmraliyê, hevdîtinên li gel rayedarên dewletê, aliyên siyasî û beşên cuda yên civakê re. Em wek DEM Partî mîna AKP’ê û MHP’ê li vê mijarê nanêrin. Ev mijareke siyasiye û pêwîstî bi tevayî partiyên siyasî û beşên civakê heye ku tê de rola wan hebe. Di vê çarçoveyê de hevdîtin û civînên DEM Partî yên li ser pêvajoyê berdewam in ka çi pêwîste bê kirin, çi pêngav werin avêtin, erk û rol çawan bên dabeşkirin. Di vê çarçoveyê de di nava vê salê de nêzî 4 hezar hevdîtin pêkhatine, ne tenê li Kurdistanê, li Tirkiye û dervey Tirkiyeyê jî ev hevdîtin pêk hatine.”
Di heman daxuyaniyê de li ser pirsa mafê hêviyê ku ji aliyê welatên Ewropayê ve biryar li ser hatiye dayîn, lê heta niha nehatiye pêkanîn Wasiyê Rêber Apo Mazlûm Dînç axivî û wiha got: “Mafê Hêviyê biryara Yekîtiya Ewropayê ye. Divê were bi cih anîn. 11 sal in ev biryar hatiye dayîn. Li aliyê din biryara Konseya Ewropayê ye. Ji ber ku her sê mehan carekê kom dibin û mafê hêviyê dixin rojeva xwe û ji bo bi cih anînê dem didin Tirkiyeyê. Herî dawiyê heta meha Hezîranê dem dan Tirkiye ku ji pêkanîna wê YE’yê agahdar bike.”
Mazlûm Dînç, destnîşan kir ku ev biryar piştî banga Bahçelî ya ku bi fermî li Meclîsa Tirkiyeyê kirî kete rojevê ku banga pêvajoya aştiyê li Rêber Apo kir. Dînç axaftina xwe wiha domand: “Ji bo ku pêvajo berdewam bike û bi ser bikeve, divê Birêz Ocalan bi awayekî pratîkî rola xwe bilîze û ji nêz ve beşdarî pêvajoyê bibe. Ji bo vê yekê, divê mafê hêviyê rasterast ji bo Birêz Ocalan were bicîhanîn û divê ew bi awayekî fizîkî azad bibe. Bicîhanîna mafê hêviyê ji aliyê Tirkiyeyê ve tê wê wateyê ku ji bo pêşvebirina pêvajoyê gavên rasterast avêtiye. Divê azadiya Birêz Ocalan di warê siyasî û ji aliyê qanûnî ve bi awayekî cidî were çareserkirin.”
