Bi sed hezaran kes beşdarî şahiya Newrozê ya li Qada Yenîkapiyê bûn ku bi pêşengiya HDK’ê hate lidarxistin. Şahî bi coş dewam dike.
GULTAN KIŞANAK: HÛN DÎROKÊ DINIVÎSIN
Aktîvîsta Tevgera Jinên Azad (TJA) Gultan Kişanak di şahiyê de axivî û got, “Hûn îro li vir dîrokê dinivîsin. Kurd li her çar aliyan li ser piyan e û azadiya xwe dixwazin.”
Gultan Kişanak ev tişt jî got: “Me ti carî dest ji Kurdîtî û têkoşîna xwe berneda. Deriyên girtîgehan vekin, ji bo ku Birêz Ocalan vê pêvajoyê bimeşîne şert û mercan ava bikin. Birêz Ocalan banga Aştî û Civaka Demokratîk kir. Ciwan wê rêya siyaseta demokratîk vekin. Em aştiyeke bi rûmet dixwazin. Em dixwazin bibin welatiyên wekhev. Em dixwazin zextên li ser ziman, çand û nasnameya me bi dawî bibin.”
Gultan Kişanak destnîşan kir ku ew li dijî şer aştiyê diparêzin û ev tişt diyar kir: “Birêz Ocalan ji bo tifaqa Kurd-Tirk bangeke pir girîng kir. Niha dema Enqereyê ye ku gav bavêje. Enqere divê dengê gelan û dengê Rojava bibihîze. Pêşî li Birêz Ocalan vekir û em siberojeke azad û wekhev ava bikin.”
KEZBAN KONUKÇU: EM Ê TEQEZ BI SER BIKEVIN
Parlamentera DEM Partiyê Kezban Konukçu jî ev tişt anî ziman: “Tevî planên têkbirinê jî, gelê me li ber xwe da. Weke HDK em ê teqez vê lîstokê têk bibin. Îro bi hincetên nerast Ekrem Îmamoglû girtin. Weke jin û ciwan em ê têbikoşin û teqez bi ser bikevin.”
KENANOGLÛ NERAZÎBÛN NÎŞANÎ YAVAŞ Ê ‘PROVOKATOR’ DA
Hevberdevkê HDK’ê Alî Kenanoglû jî nerazîbûn nîşanî Şaredarê Bajarê Mezin ê Enqereyê Mansur Yavaş da û got, “Duh li Saraçhaneyê provokatorek hebû. Gelo dema zarokên Kurd di bin panzeran de perçiqîn, te dengê xwe derxist? Cudakarî, karê van e. Em li dijî vê darbeyê ne. Me jî li Saraçhaneyê cihê xwe girt. Em ê derfetê nedin te jî. Ev Newroz, Newroza xwedî derketina li aştî û civaka demokratîk e.”
