Di stargeha ku Ajansa Mezopotamya cara ewilî dîmenê wê girtî de, gelek bermahiyên ku tê fikirîn ayîdê jin û zarokan e, hatin dîtin. Tê texmînkirin ku ev bermahî ayîdê qurbaniyên Komkujiya Seyfo ne, ku ev komkujî sala 1915’an li dijî Suryaniyan hate kirin.
Mirov bi korîdoreke tarî û teng digihije stargehê. Di hundir de, hestiyên ku li rexa dîwar hatine rêzkirin û kiloxên serî paşeroja tirsnak a di stargehê de, tîne ber çavê mirov. Lê belê heta îro ti lêkolîneke fermî nehate kirin.
Xelkê Gund bi salane heyîna vê stargehê dizanin. Gundiyan diyar kirin ku ji ber tirsa koç û komkujiyê, biryar dane ku bêdeng bimînin.
Di tevahiya dîrokê de gundê Arbo sê caran hatiye valekirin. Herî dawî sala 1990’an ji aliyê dewletê ve bi hinceta ewlehiyê hatibû tehliyekirin.
Suryaniyên ku li gund dijîn, ji sala 2001’an ve ji Ewropayê vegeriyan û gund jinûve ava kirin. Tevî vê yekê jî têkildarî hestiyên ku di stargeha li bin Dêra Mor Dimet de, ti gaveke fermî nehatiye avêtin.
Qirkirina Asûrî-Suryanî-Keldanî yan jî Seyfo di dema Şerê Cîhanê yê Yekemîn de pêk hat. Texmînên têkildarî hejmara giştî miriyan, tê guhertin. Hin rapor vê hejmarê di navbera 180.000 û 275.000 hezarê de didin. Texmînên modern îdîa dikin ku ev hejmar hîn zêdetir e.
