Di îdîaname têkildarî kuştina Seyîthan Dûrdû de ku du leşker ji dosyayê hatin derxistin, raporên balîstîk ên emniyetê û jendermeyan ji hev nakok in. Ji sê leşkerên ku di çarçoveya lêpirsînê de hatin girtin tenê têkildarî tegmen Yîgîthan Adali de îdîname hate amadekirin.
BÛYER Û GIRTINÊN DESTPÊKÊ
Roja 28’ê Kanûnê ku salvegera komkujiya Roboskî bû, bi gumana ‘qaçaxçitiyê’ di encama gulereşandina leşkeran de Dûrdû hate qetilkirin û Fermandarê Yekîneyê Mûhammet Çetîn, leşker Servet Gumuş û Yîgîthan Adali hatin girtin. Di lêpirsîna dozgeriyê de li gel ku li cihê bûyerê qalikê fîşekê hate dîtin jî hate îdîakirin ku ‘Ev fîşek ji çeka leşkeran nehatiye berdan’. Her wiha qalikê ku du rojên destpêkê bi dedektora metal nehate dîtin, di roja 3’yemîn de hate dîtin û şopa xwînê li ser bû ku ev yek bû sedema pirsê.
DU LEŞKER JI DOSYAYÊ HATIN DERXISTIN, TEGMEN BÊYÎ GIRTÎ TÊ DARIZANDIN
Di lêpirsînê de piştî ku di rapora jendermeyan de hate gotin, ‘Qalikê fîşekê ji sê çekên leşkeran nehatiye berdan’, sê leşkerên girtî hatin berdan. Dozgeriyê têkildarî du leşkeran biryara neşopandinê da, tegmen Yîgîthan Adali jî weke yekane gumanbar di îdîanameyê de hate bicihkirin. Malbata Dûrdû diyar dike ku lêpirsîn bi berpisyarî nayê meşandin.
RAPORÊN JENDERME Û EMNIYETÊ JI HEV NAKOK IN
Di îdîanameyê de ku ji aliyê Dozgeriya Komarê ya Wanê ve hate amadekirin, li gorî rapora krîmînal a Fermandariya Jendermeyan a li Qelqeliyê, “Qalikên fîşekan ên li cihê bûyerê hatin dîtin ji çeka tegmen Adali hatine teqandin’. Lê belê di rapora Laboratûwarê ya Polîsan a Krîmînal a Herêma Erzûrûmê de ku 14’ê Sibata 2025’an hate amadekirin, “Fîşeka ku Dûrdû kuşt, li nava zik gelek parçeyên metal ên mîlîmetreyî hişt, fîşeka li cihê bûyerê hate dîtin li vê rastiyê nayê, ne ew fîşek e ku bû sedema mirina Dûrdû.” Heman rapor diyar dike ku gumanbar Adali beyanên bi nakok da.
Ev rewş pirsên ‘Mûhammed Çetîn û Servet Gumuş ku girtî bûn, çawa ji dosyayê hatin derxistin?’ xiste rojevê. Dozgerî îdîayan dike ku hewl tê dayin çek û fîşeka ku Dûrdû pê hate kuştin, bê nixumandin. Tê gotin, dozgerî nêzîkatiya ‘qeza’yê dipejirîne. Parêzerên malbata Dûrdû û xizmên wî diyar dikin ku delîl têne tarîkirin û bi zanebûn tê veşartin ku fîşek ji aliyê kîjan leşkerî ve hatiye teqandin.
