Ji delegeyên kongreyê Têkoşîn Cûdî têkildarî Kongreya Awarte ya 12’emîn a PKK’ê nirxandin kir û anî ziman ku PKK ya ku 52 salan bi rengekî bê eman têkoşiya, di dîroka Kurdistanê de bi roleke girîng rabû.
Têkoşîn Cûdî diyar kir ku PKK’ê dawî li înkarkirina Kurd û Kurdistanê anî û bi vî rengî dewam kir: “Ez di serî de silav, rêz, hezkirin û bêrîkirinên xwe yên pir mezin ji bo Rêber Apo dişînim û Kongreya 12’an a PKK’ê li Rêber Apo pîroz dikim. Bi heman boneyê jî di şexsê heval Fuat, heval Riza û pêşengê pêvajoya Aştî û Demokrasiyê Sirri Sureyya Onder de hemû şehîdên şoreşê bi bîr tînim û bejna xwe li ber wan ditewînim. Hemû gelê xwe yê welatparêz û azadîxwaz silav dikim.
PKK di tarîtiyê de bû roniyek û ket nava dilê her kesê. 52 salan bê hempa jiyan kir. Şerên gelek dijwar hatin derbaskirin. Gelek şehadet hatin jiyankirin. Gelek berdêlên giran hatin dayîn. Evane hem ji bo civakê hem jî ji bo armanca azadkirina civakê, xwedî wateyek cuda bû û li ser rêya heqîqetê ev têkoşîn hate meşandin. Pêşengtiya jiyana azad û lêgerînvanê vê, pêşengê vê heqîqetê Rêber Apo ye. Rêbertî 52 salan bêyî rawestan ji bo guhertin-veguhertina kesayet, hişmendî, ji bo ku di civakê de wijdan were avakirin, ji bo ku li nirxan xwedî derketin çêbibe, ji bo jiyaneke nû ji bo gel ji pencên faşîzmê were rizgarkirin, têkoşîneke bêhempa da meşandin û di roja me ya îro de bi pêşengtiya Rêber Apo ev têkoşîn berdewam dike. Weke milîtanên Rêber Apo ji bo em bikaribin vê armancê bi ser bixînin û azadiya kûreyî pêk bînin, hem xwezayê azad bikin, hem jî azadiya civakê pêk binin ku her reng û netew bikare di nav de cih bigire ava bikin, PKK bi roleke dîrokî rabû. Em dikarin vê bêjin, cudahiya PKK’ê ya ji hemû şoreşan yek jî ev bû. Artêşbûn û partîbûna jin hate avakirin. Bi pêşengtiya jin civakbûn tê sazkirin. Rêber Apo rêya azadiyê da pêşiya çanda jin a ku beriya 5 hezar sal bi destê zilamsalariyê hate dagirtin. Bi hezaran jin beşdarî vê şoreşê bûn. Bi hezaran jin di nava şer de cih girtin û bi hezaran jin ji bo rêya azadiyê, ji bedenên xwe zarokên xwe dan. Ji bo guhertina hişmendiyê û şerê li dijî hişmendiya desthilatdariyê û şerê li dijî xwe, PKK di dîroka mirovahiyê de bi roleke girîng rabû.
PKK ruheke ku ti carî naqede. Şêweyê jiyanê ye. PKK çand e, çanda jiyankirinê ye, hunerek e û bê wesfe, mirov nikare wesfekî cudatir li PKK’ê bike. PKK’ê înkara li ser Kurdan bi dawî kir. Dema ku ev înkar hat bidawîkirin jî, ew dagirkerî û koletiya li ser hebûna jin jî hate şikandin. Afirêneriya Rêbertî di hemû kesên azadîxwaz û demokratîkxwaz de hişyarî, wijdan û lêgerîneke nû da avakirin. Hemû rewşenbîr, wêjevan û hunermendên jin em deyndarê mîrateya PKK’ê û Rêber Apo ne. Lewma divê em qîmetê vê yekê pir baş bizanin û têkoşîna vê yekê hîn kûrtir bikin û li ser vî esasî weke jinên Kurd divê em pêşengiya hemû hunermendên jin ên cîhanê bikin. Weke jin divê em li dijî sîstema kapîtalîzmê ya ku jinê weke meta bi kar tîne, xwedî li beden, ruh, hişmendî û hestên xwe derkevin. Ev erkê hunermendên jin in, ji ber ku çand bi destê jin hatiye avakirin. Rêbertî bi avakirina PKK’ê çanda jin jinûve zindî kir. Lewma li Rojhilatê Kurdistanê jî meş û serhildanên ku çêbûne, bû malê hemû jinên cîhanê û her kes xwedî lê derket. Li ser esasê dirûşmeya ‘Jin Jiyan Azadî’, îdeolojiya azadiya jin hate avakirin. Çawa Eyşe Şan û Meryem Xan bi zehmetiyên pir mezin li ber xwe dan û xwestin ku kevneşopiya civaka Kurd bi zimanê Kurdî bidomînin, Rêbertî jî li vê yekê xwedî derket. Ji Mizgînan destpê kir, bi Delîlayan, bi Berçeman di PKK’ê de hem bi ruhê xwe yê hunerî, hem bi dengê xwe, hem bi rengê xwe, hem bi têkoşîna çekdarî lûtkeyek ava kirin. Ji vir û şûnde jî divê ronahiya ku Rêbertî ava kirî, em li her devera cîhanê belav bikin, weke kevneşopiyekê em bikarin civaka Aştî û Demokrasiyê ava bikin û di heman demê de xweza, beden, têkoşîn û civaka xwe ji hemû qirêjiyên heyî rizgar bikin.”
