Partiya Wekhevî û Demokrasiyê ya Gelan (DEM Partî) ya Kocaeliyê bi beşdariya Hevseroka DEM Partiyê Tulay Hatîmogullari û gelek kesan li Kampusa Komeleyên Şaredariya Îzmîtê şeva hevgirtinê li dar xist. Şev bi pêşandana sînevîzyonê dest pê kir.
Tulay Hatîmogullari di şeva hevgirtinê de axivî, jin û zarokên ku di şewata kargeha Dilovasiyê de jiyana xwe ji dest dan bi bîr anî. Tulay Hatîmogullari bal kişand ser gelek tesîsên taxên Kocaeliyê ku nayên kontrolkirin. Tulay Hatîmogullari diyar kir ku ew ê hesabê hemû karkerên ku jiyana xwe ji dest dane bipirsin.
‘TEVGERA AZADIYÊ YA KURD GAVÊN ŞÊNBER AVÊTIN’
Tulay Hatîmogullari anî ziman ku Tevgera Azadiyê ya Kurd piştî banga Rêber Apo ya 27’ê Sibatê gavên şênber avêtine. Tulay Hatîmogullari destnîşan kir ku yek ji gavên herî girîng şewitandina çekan û biryara vekişîna ji Tirkiyeyê qonaxek krîtîk a pêvajoyê bû. Tulay Hatîmogullari ev tişt anî ziman: “Li ser van gavan komîsyon hat avakirin. Me pêvajoya vekişînê wekî gava duyemîn destnîşan kir. Di vê pêvajoyê de, dihat payîn ku meclis biryara çûyîna Îmraliyê bide.”
‘DIVÊ GIRTIYÊN SIYASÎ DEMILDEST BÊN BERDAN’
Tulay Hatîmogullari anî ziman ku divê komisyon biçe Îmraliyê. Tulay Hatîmogullari diyar kir ku divê biryarên DMME’yê bên bicîhanîn û got, “Divê hemû girtiyên siyasî yên di girtîgehê de û bi taybetî hevalên me yên ji doza komplo ya Kobanê girtî ne demildest bên berdan. Em pirsa ‘Ma hûn poşman in?’ ji kesên ku 30 sal in têdikoşin re tê kirin, qebûl nakin. Em taloqkirina cezayan qebûl nakin.”
‘YEKAN RÊYA AŞTIYA MAYÎNDE RÊXISTINKIRINE’
Tulay Hatîmogullari anî ziman ku yek ji gavên şênber ên ku divê dewlet bavêje betalkirina qanûna qeyûman e. Tulay Hatîmogullari wiha domand: “Em bi rêgezî li hemberî operasyonên li dijî CHP’ê rawestiyan û vê yekê didomînin.” Tulay Hatîmogullari destnîşan kir ku yekane rêya aştî û demokrasî bi têkoşîna rêxistinkirî pêkan e û wiha pêde çû: “Demokrasî û aştî wê li ser tepsiyeke zêrîn neyê pêşkêşkirin. Pêvajo zindî ye; her ku em wê xwedî bikin wê avakirina aştî û civaka demokratîk jî mezin bibe. Yekane rêya aştiya mayînde rêxistinkirin e.”
