Îro di çarçoveya Festîvala Fîlman a Rojava de li Navenda Çand û Hunerê ya Mihemed Şêxo, paneleke bi navê ‘Çîrokên Hevpar – Sînemaya Serbixwe’ hate lidarxistin.
Mêvanên panelê derhênerê ji Bakurê Kurdistanê Haşim Aydemir, nivîskarê ji Rojava Xoşman Qado û nivîskara Elman Maren Green bûn. Her wiha gelek hunermend, rewşenbîr û sînemahez jî beşdarî panelê bûn.
Di panelê de, bal hate kişandin li ser bingehên teorîk ên sînemaya azad û hate tekezkirin ku divê bi metodolojiyeke dîtbarî ku li ser cih, zimanê dayikê û ezmûnên rojane ye, ji şêwazên bazirganî yên serdest dûr bê sekinandin. Her wiha rola jinan di vê cureya sînemayê de û zêdebûna beşdarbûna derhênerên jin, ji hêla beşdariya wan a di parastina nasname, bîr û nîşandana tundiya li ser bingeha zayendî de hate nirxandin.
Xoşman Qado bal kişand ser girîngiya azadiyê di çêkirina fîlman de û diyar kir ku hêzên serdest bandorê li mijarên sînemayê dikin. Qado got ku rola sînemayê ew e ku rastiyê eşkere bike û tiştên li ser rûyê erdê diqewimin eşkere bike, divê ew xizmeta berjewendiyên gel bike û rêya wan a ber bi azadiyê ve ronî bike.
Derhêner Haşim Aydemîr jî destnîşan kir ku vegotina devkî (çîrokbêjî) ji kamerayê kevintir e û gel ji bo ragihandina serpêhatiyên xwe serî li çîrokbêjiya devkî didin.
Aydemir da zanîn ku Şoreşa Rojava veguherîneke mezin çêkiriye, derfet daye Kurdan ku nasnameya xwe biparêzin û tevî êrîş û astengiyan jî serkeftinên girîng hatine bidestxistin. Her wiha diyar kir ku sazî ji bo parastina mafên hemû civakan dixebitin.
Maren Green, berî ku serpêhatiyên xwe yên li Rojava parve bike, behsa rewşa sînemaya li Elmanyayê û bandora wê ya li ser dîktatorî û avahiyên otorîter kir û di berdewamiya axaftina xwe de got: “Ev yekem car e ku ez beşdarî festîvalekê dibim û serdana Rojava dikim. Berxwedan û têkoşîna ku min li vir dît, ez pir bandor kirim. Ez dibînim ku tevî zehmetiyan jî mirov têkoşînê dikin; min ferq kir ku di fîlmên ku tên nîşandan de, rastî bi hemû eşkerehiya xwe têne belgekirin û ev ji bo min bûye çavkaniyeke îlhamê ya mezin.”
Hate destnîşankirin ku Festîvala Fîlman a Rojava ji bo pêşketina sînemaya azad û bilindkirina dengê civakên herêmî platformeke girîng e.
Çalakiyên festîvalê îşev bi nîşandana fîlman berdewam dikin.
