Berdevka Meclîsa Jinan a DEM Partiyê Halîde Turkoglu Halîde Turkoglu li ber kargeha ku qetlîam lê rû da axivî û bal kişand ser wê yekê ku karkerên jin bi awayekî berbiçav hatine kuştin.
Halîde Turkoglu anî ziman ku qetlîama rûdayî polîtîkayên desthilatdariyê eşkere kiriye û got, “Ev ne qeza ye, qetlîameke ku bi awayekî berbiçav pêk hatiye. Jin, kedkarên jin, ji bo ku bikaribin parî nan qezenc bikin, digihêjin asta ku jiyana xwe ji dest bidin. Rastiya vî welatî ev e. Rastiya vê qetlîamê jî ev e.”
Halîde Turkoglu destnîşan kir ku jin tenê li malan nayên qetilkirin û got ku jin li cîhên kar jî rastî qetlîamê tên.
Halîde Turkoglu bal kişand ser vê yekê ku sazî jî bi qasî kardêran sûcdar in û axaftina xwe wisa domand: “Sûcdar û wezaretên ku vî welatî birêve dibin diyar in. Li şûna ku karên xwe bikin, ew pişta sermayedar û patronan digirin. Ew ê hewl bidin ku ev mesele bi awayekî ji rojevê derkeve. Ew ê hewl bidin ku têkoşîna maf û dadweriyê jî ji holê rakin. Lê em, wekî Meclîsa Jinan a DEM Partiyê, em ê dadweriya karkerên jin ên hatine kuştin biparêzin. Em ê destûr nedin ku ev mijar bê jibîrkirin. Divê her kesê ku ev sîstem ava kiriye hesab bide. Bila tu kes qeza an jî duşarê li me ferz neke. Em ê têkoşînê bikin da ku qetlîamên din ên karkeran nebin. Em ne neçar in ku bi vî awayî bi şewatê bimirin, em ê bi hev re hesabê vê bipirsin. Em ê biryar bidin ku em di kîjan sîstemê de û çawa dixwazin bijîn û em ê vê pêk bînin.”
Piştî daxuyaniyê, malbatên jinên hatine qetilkirin hatin ziyaretkirin.
