Zanayê olî yê Rojavayî Şêx Murşid El Xeznewî ji Numedya24’ê re axivî û diyar kir ku hem nasnameya olî hem jî ya neteweyî ji bo edalet û azadiyê berê wî dane têkoşînê.
Xeznewî got: ‘’Divê ol ji bo rejîman nebe amûrek û rêya rewakirina bêedaletiyê. Ez olê di çarçoveya berjewendiyên siyasî de bi kar naînim. Berovajî wê ol ferman dike ku ez li rex mezlûman û li dijî zaliman bisekinim.’’
Şêx Murşid El Xeznewî yê ku di şopa bavê xwe de ye, li hemberî rejîmên ku olê îstîsmar dikin, disekine û diyar kir ku parastina mafên gelê Kurd ên hatine desteserkirin egereke baweriyê ye.
Şêx Murşid El Xeznewî yê ku piştgiriyê dide modela Rêveberiya Xweser a li Rojava anî ziman ku ev avanî xwe dispêre mafên jinan, piranîparêziyê û azadiyê û bes ne dirûşmeyek e di heman demê de pergalek e ku li qadê tê sepandin û got: ‘’Rêveberiya Xweser a li Rojava jî li gel bihêzkirina rola jinan a di siyaset û civakê de di heman demê de modelek e ku rêzê li hemû olan digire û xwe dispêre azadî û wekheviyê pêşkêş dike. Ev bes ne dirûşmeyek e.’’
Xeznewî her wiha ev yek anîn ziman: ‘’Maf weke diyariyekê nayên dayîn, yan jî li hemberî ruhên kesên jiyana xwe ji dest dane weke sedeqeyekê nayên pêşkêşkirin. Berovajî wê maf bi darê zorê tên standin! Mîsyona ku îro em hildigirin ev e: Ji bo bidestxistina mafên xwe em ê yekîtiya xwe ava bikin, em ê hemû astengiyên ku di bin navê ol û siyasetê de li me tên ferzkirin derbas bikin û em ê ji hemû cîhanê re bidin îspatkirin ku gelê me wê têk neçe.’’
Xeznewî destnîşan kir ku nasnameya Kurdî meseleyeke hebûnê ye û wiha pêde çû: ‘’Rastiya herî xurt ew e; Nasnameya min a Kurdî bes ne meseleyeke aîdiyeta neteweyî ye; Ev meseleyeke hebûnê ye, meseleyeke edaletê ye û meseleyeke têkoşîna hebûnê ya ku li hemberî rejîmên ku bi sedsalan e dixwazin wê tune bikin.’’
Şêx Murşid El Xeznewî diyar kir ku li gel banga Rêber Apo ya aşitiyê şer û pevçûnên li herêmê kêm bûne û destnîşan kir ku divê êdî teqez yekîtiya gelê Kurd were avakirin.
Şêx Murşid El Xeznewî da zanîn ku ger gelê Rojava jêre daxwaza nûnertiya siyasî bike, ew ê vê yekê ne bi hêrseke şexsî bi feraseta berpirsiyariya dîrokî binirxîne û got: ‘’Ya ku ji min tê xwestin û hêvîkirin her çi jî be ez ê ji bo azadiya Kurdistanê di eniyên herî pêş de bim.’’
Xeznewî di dawiya axaftina xwe de got: ‘’Zanabûna min a olî nayê wateya xwejêdûrxistina pirsgirêkên gelê min. Peyama rastîn a olî, ne di îzolasyonê de ye ne jî di bêalîgirbûnê de ye. Zanabûn girêdayî têkoşîna li hemberî bêedaletiyan û dilsoziya xurt a ji rastiyan re ye.’’
