- Raza guhertinê, tenê şerkirina bi yê kevin re nîne. Bi hemû hêza xwe ve, avakirina yê nû guhertin û veguhertinê bi xwe re tîne.
Gelek ruyên heqîqetê hene ku xwe nîşan dide. Hin caran bi yek gotinê, hin caran bi yek gavê, hin caran bi yek tevgerê, hin caran bi yek çalakiyê û hwd. Di tevgera PKK de ev nişane bi hev re derketin holê. Gotina ‘Kurdistan mêtîngehe’ yekemîn hejandina statukaya heyî bû. Weke partiyekê xwe birêxistinkirin formê wê yê danehevê û têkoşîna bi rêbazê şerê çekdarî, vê heqîqetê kire serpêhatiyeke dîrokî ya ji nîv esrî derbas kir. Bi xwe re gelek encam anî. Encama herî bi wate ya vê dîrokê serxistina hebûna gel û misogerkirina vê hebûnê bû.
Lê di nava vê pêvajoya dûdirêj û dagirtî de heqîqeteke din a ji ber qeraxa kendalê hate rizgarkirin hebû. Jina ku weke sembola welatê dagirkirî, talanbûyî û hilweşandî bû, dida ser rêya azadî û hebûna bi rûmet û ji bo vê jî şerê herî dijwar dikir. Şerê çekdarî, şerê bi hişmendiya serdest a mêr re, şerê tola tevahî dîroka regezekî dikir ku dîroka ku dihat ferz kirin li ser vê ava bibû. Ji bo vê şert û merc pir giran bû lê carekê ji ew deriyê qefilkirî derketinek çêbibû. Serkeftina herî mezin jî weke jin û mêr li kêleka hev, bi hev re meşa azadiyê bû. Di cewherê xwe de di encama têkoşîna ji nîv esrî derbaskiriye de ya ku bi ser ketibû ev bû. Peywendiya di navbera jin û mêr a li ser milk û kuştinê veguherî û hevaltiya jin û mêr a li ser bingeha azadî û hebûnê derkete holê. Ev xal ji Kurdbûnê wêdetir bû. Sererastkirina dîrokê pêk dihat. Di cewherê xwe de şoreşa esasî ev bû.
Ev guhertina binyadî roja 11ê meha Tirmehê di wan kêliyên dîrokê yên di wateya guhertina rêbazê têkoşîna azadiyê de careke din derket holê. 30 şoreşgerên bêaman ên ji nav dilê çiya derketin henase û nebzê dilê tevahî dinyayê lê bi taybetî yê Kurdistanê di hebûna xwe de hewandin. Li gorî felsefe û bîrmendiya rêhevaltiya ku di PKK de derketiye holê û ferqa herî mezine, 15 jin û 15 mêrên ku ji warên xwedawendan û çavên xwe ji melkemotê re naniqînin bi pêşengtiya jinekê, çekên xwe şewitandin û peyama xwe ya zelal a ji bo jiyan û civakeke demokratik ragihandin. Hêz û serberziya di sekna wan de cihê rêzê bû. Lê ev hêz û îradeya heyî xwedî paşxaneyeke kur bû ku heta roja me ya îro hatibû. Rêyeke zehmet bi kesên asayî naçe serî. Her şoreşgereke jin û mêr ên çeleng xwe ji bo wê rêya zehmet, gava yekem a dîrokî avêtin. Dil û hişmendiyeke hevgirtî ya ku dikare çekan bihelîne di bîra me de ava kirin. Di heman demê de rêbaza ku wê ber bi serkeftinê bibe jî di wê sekna bi hişmendiyê dagirtî pêşkêşî tevahî cîhanê kirin. Çalakiya xwe bi ser xistin.
Raza guhertinê, tenê şerkirina bi yê kevin re nîne. Bi hemû hêza xwe ve, avakirina yê nû guhertin û veguhertinê bi xwe re tîne. Hişmendiya bi pêşengtiya PKKê vê razê bi awayê herî xwirt bi dest xistiye. Him bi yê kevin re şer kir û her wiha niha jî bi hemû hêz û lêhurbûna xwe ve, ji bo avakirina ya nû jî daye ser rê. Wê vê jî bi hevaltiya herî bedew a jin û mêr pêk bîne.
