Rêveberiya Xweseriya Demokratîk a Herêma Bakur û Rojhilatê Sûriyeyê têkildarî hevdîtinên dawî yên di navbera Rêveberiya Xweser û hikûmeta demkî de daxuyaniyek weşand. Rêveberiya Xweser diyar kir ku di hevdîtinan de, nûnerên hikûmetên Amerîka û Fransayê amade bûn. Rêveberiyê hevdîtin bi gaveke gelek girîng ji bo destpêkirina diyaloga Sûriyeyî-Sûriyeyî ya cidî wesifand.
Rêveberiyê di daxuyaniyê de spasiya DYA û Fransayê kir ku ji bo bidestxistina aramî, aştî û demokrasiyê li Sûriyeyê gelek hewldan dikin. Ji bo rêveberiyê, nîqaşkirina dozên çarenûsî bi awayekî zelal û cidî piştî ewqas nakokî, destkeftiyeke siyasî ya dîrokî ye û vegerandina baweriyê di navbera hêzên çalak ên Sûriyeyê de wek pêwîstiyekê bi nav kir ji bo ku diyalog dest pê bike.
Di daxuyaniyê de rêveberiyê wiha got: “Dem hatiye em zimanê li dijî tevna Sûriyeyî, zimanê ku parçebûna siyasî û civakî kûrtir dike, derbas bikin. Pirrengiya li Sûriyeyê ne li dijî yekîtiya wê ye, lê belê çavkaniya hêzê ye ku divê em biparêzin. Hevkarî anku şeraket bingeha avakirina dewletê ye.”
Bi domdarî hate gotin ku yekitiya Sûriyeyê ne mijara bazaran e, lê di nêrîna wê û hemû hêzên siyasî yên tev li projeya wê ya demokratîk bûne de stûneke bingehîn e û kirina bazaran li ser vê rêgezê derfetên çareseriya siyasî asteng dike. Rêveberiyê, destnîşan kir ku pergala demokratîk a pirreng, edaleta civakî, wekheviya zayendî, destûrek ku mafên hemû pêkhateyan misoger dike, daxwazên ne nû ne lê belê cewhera sedemên ku ji ber wê Sûriyeyî sala 2011’an serî hildaye. Rêveberiya Xweser diyar kir ku redkirina van daxwazan û wesifandina wan bi cudaxwaziyê, rastiya dîroka têkoşîna sûriyeyî ya li hember zordestiyê berovajî dike.
Bi domdarî wiha hate gotin: “Sûriyeyî ev gelek serdem in ji ber pergala navendî û aloziyan êş û zehmetî kişand, lê em hêvî dikin ku di avakirina Sûriyeya nû, Sûriyeya nenavendî de bibin şirîkên çalak. Em dev ji armancên şoreşa 15`ê Adarê û 19`ê Tîrmehê bernadin. Li ser vê esasê em dibêjin ku em amade ne li ser bingeheke demokratîk tev li saziyên dewletê û sazkirina destûra nû ya Sûriyeyê bibin ku hêviyên sûriyeyiyan rave dike.
Em bang li tevahî aliyan dikin ku xwedî berpirsyariyeke niştimanî bin, dev ji kîn û tundiyê berdin, li hember hewldanên derxistina aloziyên hundirîn bisekinin. Her wiha em bang li hêzên siyasî yên niştimanî dikin ku di vê pêvajoya hesas de hevgirtî bin, diyaloga Sûriyeyê ji hewldanên têkbirina wê biparêzin, hêviyên gelê Sûriyeyê di dewleteke sivîl, demokratîk û adil de bi dest bixin.”
