32’yemîn Kampa Îstîşare û Nirxandinê ya AKP’ê ya li navçeya Kizilcahamam a Enqereyê dest pê kir. Serokkomarê AKP’yî Tayyîp Erdogan, axaftina destpêkê kir. Erdogan, çalakiyên çekdarî yên PKK’ê bibîr xistin û got: “Ji wê rojê heya niha gelek hikûmet hatin. Her yekê ji wan got, ew ê qira terorê bînin. Lê teror, ne li welatê me ne jî li xakê welatên din nehat qedandin. Helbet di vê de sebeb hin pêkanînên şaş ên dewletê bûn jî. Torosên Spî yek ji van bû. Cinayetên kiryar nediyar yek ji van bû. Girtîgeha Amedê yek ji van bû. Gundên hatin şewitandin, mirovên di şevekê de bi darê zorê hatin koçberkirin, dayikên nikaribûn li girtîgehê bi zarokên xwe re bi Kurdî biaxivin, ev pêkanînên şaş bûn. Rêbazên têkoşînê yên li dervî hiqûq û rewabûnê, ji dêvla ku terorê biqedînin, berevajî ew gurtir kirin, mezintir kirin; zemîneke guncav ê îstismarê dan terorê. Me bi hev re bedêla şaşiyan da.”
Erdogan, destnîşan kir ku pêvajoya pevçûnî bi qasî 2 trilyon dolar zirara daye aboriyê û behsa biryara fesixkirinê ya PKK’ê kir. Erdogan got: “Duh jî, rêxistinê biryara girtibû pêk anî û bi taybetî bi merasîmekê çek danîn. Belaya terorê ya 47 salan ji duh ve, ket pêvajoya dawîbûnê, înşeleh. Tirkiyeyê duh dest bi girtina rûpeleke dirêj, êşbar kir. Îro, em ji bîr nekin, rojeke nû ye. Îro, di dîrokê de rûpeleke nû vebûye. Îro, deriyên Tirkiyeya mezin, Tirkiyeya bihêz, sedsala Tirkiyeyê heya dawiyê vebûn.”
Erdogan, ku got “Hûn ê di tiştên ji bo xêra Tirkiyeyê de me tim li pêş bibinin” wiha axivî: “Hûnê her tim me li hemberî hewldanên ku bi kêrî Tirkiyeyê neyê bibînin. Em baş dizanin ku em çi dikin. Bila tu kes netirse, neqiqlqile. Bila serê kesî bi pirsnîşanan tije nebe. Em çi bikin, em ji bo Tirkiyeyê dikin, em çi bikin em ji bo gelê xwe, ji bo siberoja xwe dikin.”
Erdogan got: “Ger Tirk-Kurd-Ereb bi hev re bin, wê çaxê Tirk, Kurd, Ereb hene. Gava ji hev dûr bikevin, têkçûyîn heye.”
Erdogan ku got “Tirk û Kurd di muhabetê de hev hembêz dikin” wiha got: “Îro ruhê Malazgirê, tifaqa Qudsê ji nû ve şikil digire. Îro berbanga Tirkiyeya mezin û bihêz davêje. Komara Tirkiyeyê warê me yê hevpar ê hemûyan e.”
Erdogan ev tişt gotin: “Niha em ê rûnên û biaxivin… Ne çekan. Em ê rû bi rû, dil bi dil biaxivin. Em ê pêdiviyên qanûnî yên pêvajoyê di bin banê Meclîsê de nîqaş bikin.”
