Hevseroka Konseya Rêveber a KCK’ê Besê Hozat jî di nav de komekî gerîla ya ji 30 kesan pêk dihat, di çarçoveya banga dîrokî ya Rêber Apo ku di 9’ê Tîrmehê de kir, li Şikefta Casenê ya gundê Surdaş a Dukanê ya bi ser Silêmaniyeyê çekên xwe şewitandin. Rêveberê Mûzeya Ewlekariyê ya Neteweyî Ako ragihand ku çekên hatine şewitandin wê li Şikefta Casenê werin parastin.
Xerîb wiha got: “Biryar hatibû dayîn ku çekên hatine şewitandin bibin Mûzeya Neteweyî ya Emne Sureke û li wê derê were pêşandan û parastin. Lê ev biryar piştre hate guhertin. Li gorî biryarê çek li cihê ku hatine şewitandin, ango li Şikefta Casene werin parastin. Sibê ango 12’ê Tîrmehê ji bo parastina çekan bi armanca diyarkirina cihekî taybet prosedurek were diyarkirin û biryar were dayîn ku bê ka çawa werin parastin.
