Parêzer Rozîv Ehmed têkildarî Mafê Hêviyê ya ji bo Rêber Apo ji ANF’ê re axivî. Rozîv Ehmed diyar kir ku mafê hêviyê mafekî rewa ye lê belê dema ku mijar dibe Rêber Apo ew maf wenda dibe, ev jî cihê lêpirsînê ye û got: ‘’Hemû mafên Rêberê me tên binpêkirin. Rêber Apo ji Sibata 1999`an ve ye li Girtîgeha Îmraliyê dîl tê girtin û ji wê demê û heta niha jî Rêberê me di bin tecrîdekê de ye û hemû mafên Rêber Apo jî tên binpêkirin. Ev jî tiştekî ne rewa ye, dixwazin mafên Rêber Apo yên hiqûqî jî qut bikin. Dema ku girtiyek tê girtin mafên xwe hene , divê malbata xwe, parêzerên xwe bibîne. Lê ev maf jî li ser Rêber Apo hatiye qedexekirin. Ev salên dawî jî îsbata wê yekê ye ku bi salan e Rêber Apo di bin tecrîdekê de ye.”
`DEWLETA TIRK SÛCAN DIKE`
Rozîv Ehmed di dewama axaftina xwe de anî ziman ku mehrûmkirina ji mafê hêviyê, beşeke ji êşkenceyê ye û wiha pêde çû: ‘’Di qanûnên cîhanî de navê xwe mafê hêviyê ye, li gorî qanûnên mafên mirovan ên navneteweyî mafê hêviyê ew e ku kesên cezayê heta hetayê lê hatine birîn piştî 25 salan, mafê xwe heye ku bi awayekî fîzîkî rizgar bibe û ji zîndanê dekeve. Lê belê mixabin ku Rêberê me ji vî mafî jî bêpar e. Ne tenê ji mafê hêviyê ji mafê herî biçûk jî hatiye mehrûmkirin, mînaka wê jî nivîsên Rêber Apo ye, ku piraniyên wê dernakevin, dewleta Tirk van weke sûcekî dibîne, ev yek bi xwe jî rêbazeke tecrîdê ye.”
`TIŞTA KU DEWLETA TIRK DIKE NE HIQÛQÎ YE`
Rozîv Ehmed di dawiyê axaftina xwe de got ku Rêber Apo ji pirsgirêkên Rojhilata Navîn û jinan re rêya çareseriyê dîtiye û ev yek anîn ziman: ‘’Rêber Apo ji tevahiya pirsgirêkên Rojhilata Navîn re rêya çareseriyê ye, bi heman awayî ji pirsgirkên jinan re jî rêya çareseriyê ye. Çawa ku em di cildên manîfestoyê de dibînin ku azadiya jinan beriya her tiştî ye, di heman demê de jî ji tevahî aloziyên li Rojhilata Navîn re jî çareserî dîtiye. Rêber Apo di banga xwe ya 27’ê Sibatê ya Aşitî û Civaka Demokratîk de diyar dike ku ew aşitiyê ji tevahiya Rojhilata Navîn re dixwaze. Rêber Apo beriya niha jî ew bang kiribû lê dewleta Tirk xwest bi rêya tecrîdê wê bangê bitepisîne, lê belê a niha em jî dibêjin ku dewleta Tirk kiryarên ku pêk tîne, ne hiqûqî ne, ev di pîvanên hiqûqê de tune ne.”
