Komîsyona ku li Meclîsê ji bo çareserkirina pirsgirêka Kurd di çarçoveya pêvajoya “Banga Aştî û Civaka Demokratîk” a Rêber Apo de hatiye avakirin, di 5’ê Tebaxê de civîna xwe ya ewil lidar xist.
Serokê Komeleya Mafên Mirovan (ÎHD) a Şaxa Amed Ercan Yilmaz, diyar kir ku ev pêvajo ji bo çareseriyeke demokratîk firsendeke girînge. Yilmaz, anî ziman ku ew ji nû ve destpêkirina pêvajoya muzakereyan bi kêfxweşî pêşwazî kirine û got ku pirsgirêka Kurd bi polîtîkayên ewlehiyê çareser nabe.
Yilmaz, destnîşan kir ku behskirina Devlet Bahçelî ya ji bo şert û mercên azadiyê yên Rêber Apo û banga Rêber Apo ya ji bo fesixkirina PKK’ê pêvajo gihandiye qonaxeke nû.
Yilmaz, diyar kir ku divê komîsyon çarçoveya dîrokî bi baldarî bigire dest û da xuyakirin ku binpêkirinên mafên li dijî Kurdan ji damezrandina Komarê vir ve, polîtîkayên asîmîlasyonê û qedexeyên li ser ziman di bingeha pirsgirêkê de ne.
Yilmaz, pêşniyar kir ku ji bo çareseriyek mayînde, pirsgirêkên wekî windakirinên bi zorê, girtinên siyasî û binpêkirinên mafê dengdanê divê ji hêla komîsyonên din ve werin çareser kirin û got ku divê civaka sivîl, baro, zanîngeh û parêzvanên mafên mirovan di pêvajoyê de cih bigirin.
Yilmaz, bal kişand ser girîngiya sembolîk a meşandina pêvajoya aştiyê di bin banê meclîsê de û diyar kir ku divê ev mijar bi beşdariya hemû partiyên siyasî, ne tenê partiya desthilatdar, were çareserkirin. Ercan Yilmaz, da zanîn ku ji ber dewlet hêj gavên pêbawer neavêtiye di nava gel de fikar hene.
Yilmaz, diyar kir ku biryara fesixkirina PKK’ê hinceta dewletê ya ji bo avakirina “hawîrdorek pevçûnê” ji holê rakir û got ku tenê pêkanîna qanûnên heyî jî dikare rê li ber gelek binpêkirinên mafên mirovan bigire.
Di dawiyê de Ercan Yilmaz, anî ziman ku divê komîsyon gavên wêrek bavêje, bi Rêber Apo û hemû aliyên ku dikarin di çareseriyê de rolek bilîzin re hevdîtin bikin.
