Kampanyaya ‘I Want to Visit Ocalan’/ ‘Ez dixwazim bi Ocalan re hevdîtinê bikim’ 5’ê Hezîrana 2025’an hate destpêkirin. Li Sûriyeyê jî di 20`ê Tebaxê de ji aliyê Înîsiyatîfa Azadiya Rêber Abdullah Ocalan a Sûriyeyê û Înîsiyatîfa Parêzeran a Sûriyeyê ya ji bo Parastina Rêber Abdullah Ocalan hatibû destpêkirin, îro (10`ê Îlonê) bi dawî bû.
Di daxuyaniya destpêkirina kampanyayê de hatibû gotin ku ev xebat wê 30`ê Tebaxê bi dawî bibe, ji ber eleqeya zêde ya ji bo kampanyayê dema vê xebatê heta îro (10`ê Îlonê) hate dirêjkirin.
Li gorî agahiyên ku Endamê Rêveberiya Înîsiyatîfa Azadiya Rêber Abdullah Ocalan a Sûriyeyê Ferzende Munzur dane ajansa ANHA’yê , hejmara kesayetên hiqûqnas, akademisyen, siyasetmedar, rewşenbîr, serokê eşîr, oldar, bijîşk, endezyar, rûspî (Suryan-Aşûr, Êzidî), pêkhate û mezhebên (Kurd, Ereb, Suryan-Aşûr, Êzidî, Tirkumen, Çerkes, Sinî, Elewî, Îsmaîlî, Durzî, Xiristiyan) yên ku daxwaza hevdîtina bi Rêber Abdullah Ocalan re dikin, 2 hezar derbas kiriye, lê niha ew nikarin hejmara dawî ragihînin û wiha anî ziman: “Hejmara dawî ya tevlîbûnê wê di 21`ê Îlonê de bê eşkerekirin.”
Ferzende Munzur da zanîn ku ji hemû kantonên Herêma Bakur û Rojhilatê Sûriyeyê, her wiha hemû parêzgehên Sûriyeyê yên Şam, Heleb, Humis, Laziqiyê, Tertûs, Dera, Qûneytira, Idlib û Siwêdayê kesayet beşdar bûne.
Îmzeyên hatine komkirin, wê pêşkêşî Sekreterê Neteweyên Yekbûyî (NY), Yekîtiya Ewropayê, Konseya Mafê Mirovan a NY`ê, Rêxistina Pêşîgirtina Îşkenceyê ya Ewropayê (CPT), Wezareta Edaletê ya Tirkiyeyê bê kirin.
