Xwendekara pola yekemîn a Beşa Pêşvebirina Zarokan a Zanîngeha Yuzucu Yil a Wanê Rojîn Kabaşî 27’ê Îlona 2024’an li wargeha lê dima winda bû û piştî 18 rojan di 15’ê Cotmehê de li peravê Molla Kasim cenazeyê wê hate dîtin. Piştî ku cenaze hate dîtin, di rapora ji Saziya Tipa Edlî ya Stenbolê (ATK) de hate gotin, “Nîşaneya destavêtinê hatiye dîtin.” Di rapora ji heman saziyê de ku piştî salekê di 10’ê Cotmehê de hat, hate tespîtkirin ku DNA ya du mêran li ser bedena Rojîn Kabaîş hatiye dîtin, yek ji wan li ser sînga wê, ya din jî li cihê vajînalê hatiye dîtin. Bi vê raporê re întimala destavêtinê zêde bû.
SAZIYA TIP A EDLÎ LÊPIRSÎN DERENG XIST
Serokê Baroya Wanê Sînan Ozaraz ji ANF’ê re axivî û bi bîr xist ku piştî otopsiyê nimûne ji Saziya Tip a Edlî ya Stenbolê re hatin şandin û qala pêvajoyê kir, “Bi rapora Tip a Edlî re diviyabû meha Mijdarê dane bihatina ragihandin; li ser vê yekê jî bi xurtî û bi lez lêpirsîn bihata meşandin. Mixabin Saziya Tipa Edlî ev yek eşkere nekir. Li ser daxwaza me dozgeriyê ragihand ku di vê beşa raporê de valahî heye û diyar kir ku divê bê eşkerekirin, lê belê bê bersiv ma. Li gel ku du caran hate dubarekirin jî bê bersiv hate hiştin. Dawiya dawî beriya mehekê hate bibîrxistin ku ATK dosyayê li demê belav dike, delîlan parve nake û gilî hate kirin. Lis er vê yekê rojên derbasbûyî rapor gihîşt dosyayê. Ev rewş bû yek ji sedemên bingehîn ku lez û bandora lêpirsînê asteng kir.”
LÊPIRSÎNA LI SER NÊRÎNA ŞAŞ
Ozaraz bi bîr xist ku wan destnîşan dikir ku piştî Rojîn Kabaîş winda bû li dijî hiqûqê bû ku lêpirsîn tenê li ser nêrîna xwekuştinê hate meşandin, divê îhtimalên din ji nedîtî ve neyên û got, “Ya rast yek ji sedemên derengketina dosyayê di qonaxa destpêkê de ew bû ku lêpirsîn li ser nêrîneke şaş hate meşandin. Di destpêka lêpirsînê de li ser bedena Kabaîş DNA hate tespîtkirin û weke delîleke şênber li dosyayê hate bicihkirin. Ji ber ku DNA du mêr ên cuda li cihên girtî yên zayendî hatin dîtin, diviyabû mijara destavêtina bihata lêpirsîn, di vê mijarê de gilî bihata kirin. Dawiya dawî eşkere bû ku ji xwekuştinê wêdetir dibe ku hatibe kuştin.”
LI GORÎ DELÎLÊN NÛ DIVÊ LÊPIRSÎNEKE XURT BÊ MEŞANDIN
Ozaraz xwest, ji roja ku Rojîn hat Wanê û li zanîngehê bi cih bû heta bi roja winda bû divê têkildarî kesên têkilî pê re danîn, wezîfedar, berpirsyar, qada lê winda bû, kesên ku têkiliya nêz bi wê re danîn bêne lêpirsîn, DNA bêne lêkolîn, îfadeya wan bê girtin û lêpirsîn bê meşandin.
