Cenazeyê ku serê sibehê ji Edeneyê hate anîn, pêşiyê ji aliyê jinan ve hate pêşwazîkirin. Piştre li gel konvoyeke dirêj cenaze birin Cizîrê û cenaze di têketina navçeyê de ji aliyê girseya gel ve hate pêşwazîkirin û birin gundê Bêrîvan Kûtlû yê bi navê Navyana. Hevseroka Giştî ya DEM Partiyê Tulay Hatîmogûllari û gelek jinên aktîvîst beşdarî merasîma veşartinê bûn.
Di têketina gund de dengê zêmaran bilind bû û ji bo Bêrîvan Kûtlû stran hatin strîn. Cenazeyê ku bi şalika kesk, sor û zer hatî pêçandin, li ser milê jinan hate hilgirtin û birin goristanê. Di merasîmê de gelek caran dirûşmeya; ‘’Şahîd Namirin’’ hate berzkirin. Cenaze, li gel dia û zêmarên jinan hate veşartin.
Hevseroka Giştî ya DEM Partiyê Tulay Hatîmogûllari di merasîmê de axivî û diyar kir ku Bêrîvan Kûtlû jiyana xwe bexşandibû têkoşîna ji bo aşitiyê ya gelê Kurd û hemû gelan.
Hevseroka Giştî ya DEM Partiyê Tulay Hatîmogûllari ev yek anîn ziman:
‘’Em ê hevrêya xwe Bêrîvan bi wî rûyê wê yê paqij û ronî û awirên wê yên hestiyar bi bîr bînin. Em ê wê li gel têkoşîna wê bi bîr bînin. Em ê wê bi cil û bergên wê yên gelêrî û tiliyên wê yên ji bo azadiyê bilind dibûn, bi bîr bînin. Wê wisa di bîra me de bimîne.
Li ser gora wê bila ji hemû şehîdên me û kesên bedêl dayîn re soza me be ku, em ê li ser van xakan xwişk-biratiya gelan ava bikin. Em ê aşitiyê pêk bînin.’’
Adalet Çîmen Fîdan jî li ser navê TJA’yê axivî û diyar kir ku Bêrîvan Kûtlû ji zarokatiya xwe ve tim di nava têkoşîna azadiyê de cih girtiye û ev yek anîn ziman:
‘’Hevrê Bêrîvan, digot ku heya jin azad nebin gelê Kurd jî azad nabe û digot ku bêdengmayîn û sekinîn heram e. Di wê baweriyê de bû ku diviya tim berxwedan hebe. Weke TJA’yê em ê hevrêya xwe Bêrîvan Kûtlû weke şehîda demokrasiyê bi bîr bînin. Rêya hevrê Bêrîvan, rêya me ye.’’
Piştî merasîmê jinan kulîlk danîn ser gora Bêrîvan Kûtlû. Girseya gel piştre derbasî merasîma sersaxiyê ya li navçeya Silopyayê bû.
