Akademiya Jineolojiyê ya Bakur û Rojhilatê Sûriyeyê, di çarçoveya 25’ê Mijdarê Roja Têkoşîna Li Dijî Tundiya Li Ser Jinan de bernameya xwe ya çalakiyan a berfireh a ji 16’ê Mijdarê ve ye li gelek bajarên herêmê didomîne, berdewam dike. Semîner, panel û komxebatên li bajarên Heleb, Tebqa û kantonên Firat û Cizîrê tên lidarxistin, wê bi panela mezin a bi sernavê ‘’Li dijî çanda Satî Jin, Jiyan, Azadî’’ ya ku wê di 2’yê Kanûnê de li bajarê Qamişloyê were lidarxistin, bi dawî bibe.
Di vê çarçoveyê de di navbera 30-31’ê Mijdarê de li bajarê Qamişlo yê girêdayî Kantona Cizîrê bi sernavê ‘’Dîroka Felsefeyê û Di Felsefeyê De Jin’’ komxebateke du rojî hate lidarxistin. Moderatoriya bernameyê ji aliyê endama Akademiya Jineolojiyê Bêrîvan Ebbas ve hate kirin û gelek jinên ji Akademiya Jineolojiyê beşdarî bernameyê bûn.
ROJA EWIL: JÊDERKA FELSEFEYÊ Û FÎLOZOFÊN JIN
Di roja ewil a komxebatê de mijarên weke pêşketina serdemî ya dîroka felsefeyê, felsefeyên hemû serdeman li gel kîjan bûyerên civakî-siyasî derketine holê û rola jinan a di van serdeman de hatin nîqaşkirin. Ji gotina navend Yewnan e wêdetir hate destnîşankirin ku felsefe xwediyê paşerojeke kevintir e û mijarên rola fîlozofên jin ya di tevahiya dîrokê de û bê ka ev rol çawa hatiye veşartin, hatin gotûbêjkirin.
Bi taybetî eşq û agahiya ku Rêber Abdullah Ocalan işaret pê kir, di diyaloga Sempozyûma Platon de ku qala wê yekê dike bê jinek çawa mêrekî perwerde dike, diyaloga navbera Sokratek û rahîbe Diotima ya ji Mantineiayê ye. Di wê diyalogê de jin agahiyê dide mêrekî û nîşan dide ku diyaloga felsefî bi rengekî wekhev dikare bê kirin. Lewma ev yek ji ailyê beşdaran ve weke rabûneke xurt a li ber kevneşopiya felsefeya bi serweriya mêr hate şîrovekirin.
ROJA DUYEMÎN: KOMXEBATA LI GEL ÇAR KOMAN
Roja duyemîn li gel çar komên cuda komxebat hatin lidarxistin. Li dora pirsên weke; ‘’Divê têkiliyên jina felsefîk çawa bin?’’, ‘’Dikare hişmendiya jinan di felsefeyê de çawa ji nû ve were avakirin?’’, ‘’Di nivîsandina dîrokê de rastiya jinan çawa tê eşkerekirin?’’ nîqaşên dûrûdirêj hatin kirin.
‘HER DÎROKA KU TÊ NIVÎSANDIN RAST NÎNE’
Endama Akademiya Jineolojiyê ji ANF’ê re axivî û têkildarî xebatan ev yek anîn ziman:
‘’Di komxebata duh de em li ser dîroka Suryaniyan sekinin îro jî mijara me dîroka felsefeyê ye. Her çend were gotin ku felsefeyê li Yewnanê dest pê kiriye jî a rastî felsefe xwediyê paşerojeke gelekî kevn e. Em li ser rola jinan a di felsefeyê de sekinîn û têkildarî mijarên bê ka em ê vê hişmendiyê çawa bixin meriyetê û di xebatên xwe çawa nîşan bidin, axivîn. Me di çarçoveya Manîfestoya Civaka Demokratîk a Rêber Apo de nirxandin kirin. Weke ku Rêbertî aniye ziman; ‘divê em xwe bigihînin jêderka tiştên heyî.’ Her dîroka ku tê nivîsandin rast nîne. Em neçar in ku paşerojê lêkolîn bikin û rastiyan eşkere bikin.’’
Endama akademiyê Alya Osman jî ev yek anîn ziman: ‘’Ji bo xwenaskirin û xwepêşxistinê ev çalakî gelekî girîng in. Me têkildarî dîroka felsefeyê, rêbaza fikirînê û bi taybetî jî rola jinan a di felsefeyê de ya veşartî nîqaşên kûr kirin. Li vir bes semîner nehate lidarxistin; em li ser mijara ku di dîrokê de rastiya jinan çawa hatiye veşartin û em dikarin çawa wê rastiyê derxînin holê axivîn. Têkildarî bandora fikra jinan a li ser felsefeyê pirsên pir serkeftî derketin holê.’’
