Bi destpêkirina qedexeyê re kesên temenê wan di bin 16 salî de ne wê nikaribin hesabên platformên medyaya dijîtal ên mîna Instagram, TikTok, Snapchat, Facebook, YouTube, Reddit û yên din, vekin û hesabên heyî jî wê bên betalkirin. Şîrketên ku qanûnê binpê bikin wê heta 28 mîlyon euro ceza li wan were birîn.
Hikûmetê ragihand ku armanca vê tedbîrê zarokan ji girêdana algorîtmayan, zordariya li ser înternetê, xapandin û îstismarkarina li ser înternetê biparêze ye. Serokwezîr Anthony Albanese diyar kir ku medyaya dijîtal “bûye çekek ji bo tacîz û îstismarkirinê.”
Tevî ku ev biryar ji hêla gelek malbatan ve erênî hat pêşwazîkirin jî, beşek girîng a ciwanan difkirin ku wê bandora qanûnê çênebe. Hin malbatên ku piştgirî dan qanûnê, diyar kirin ku zordariya li ser înternetê û naverokên tijî zirarê dide derûniya zarokên wan.
Gelek şîrketên teknolojiyê yên mezin ên wekî Meta û YouTube, bertekek nîşanî biryarê dan û ragihandin ku wan dest bi sepandina qanûnê kirine. Her wiha hin komên mafên mirovan bi hinceta ku qanûn azadiya ramanê binpê dike serî li Dadgeha Bilind dan. Reddît jî ragihand ku ji bo betalkirina qanûnê wê serî li rêyên hiqûqî bide.
Welatên wekî Zelanda Nû û Malezya bi baldarî biryara Awustralyayê dişopînin. Hikûmet qebûl dike ku “ne bi hêvîne ku qanûn destpêkê pêk were” û bi bîr xist ku hin ciwan wê rêya ketina paltforman bibînin. Platform ji bo diyarkirina temenê bikarhêneran wê rêbazên zekaya çêkirî, analîza rû û teyîdkirina nasnameyê bi kar bînin.
