Ji bo daxwaza pêkanîna biryara “mafê hêviyê” ya Dadgeha Mafên Mirovan a Ewropayê (DMME) ya derbarê Rêber Apo de, wê di 4’ê Çileyê de li Amedê bi dirûşma “Hêvî û Azadî” mîtîngeke girseyî bê lidarxistin. Çetîn Arkaş ê ku di sala 2015’an de 9 mehên xwe bi Rêber Apo re li girava Îmraliyê derbas kir û piştî 33 salan jî girtîgehê hate berdan,li ser girîngiya Civînên Aştî û Civaka Demokratîk û mîtînga 4’ê Çileyê ji Medya Haber TV’yê re axivî.
CIVÎNÊN AŞTÎ Û CIVAKA DEMOKRATÎK
Çetîn Arkaş bal kişand ser girîngiya Civînên Aştî û Civaka Demokratîk û wiha got: “Gel di gelek mijaran de kêm agahdar e. Gilî û rexneyên wan hene. Beşek girîng ji wan jî rast in. Me ferq kir ku di gihandina Rêbertiyê ya ji bo gel de kêmasiyek heye. Mirov ji bo tiştên ku Rêbertî hewl dide bike, bawerî û ewlebûna wan heye. Lê belê me dît ku di vê mijarê de kêmasiya hişmendiyê heye. Di civînên derbasbûyî de em pê hesiyan. Ji ber wê divê civînên bi vî rengî bêtir û berfirehtir werin lidarxistin. Piştî her axaftineke me, dîtina ku mirov derbarê pêvajoyê de hinekî din ronî dibin û bi xwe vê yekê tînin ziman, di me de nêrîneke bi vî rengî ava dike.”
BANGA JI BO MÎTÎNGA 4’Ê ÇILEYÊ HATE KIRIN
Çetîn Arkaş bal kişand ser girîngiya mîtînga ku wê di 4’ê Çileyê de li Amedê were lidarxistin û axaftina xwe wiha berdewam kir: “Mîtîng pir girîng e, divê her sazî, her komele û hema hema hemû partiyên siyasî bi hemû hêza xwe beşdarî xebatên mîtîngê bibin. Tişta ku divê were kirin ev e. Gelê Kurd dest ji Rêbertiya xwe bernade. Ev yek wê di 4’ê Çileyê de li Qada Îstasyonê ya Amedê bê ziman. Gel û jin wê daxwaza azadiya Rêber Apo bi dengê herî bilind bînin ziman. Tenê bi gotinê namînin, wê teqez Rêber Apo azad bikin, baweriya min bi vê yekê tam e.”
