Endama Federasyona Gaziyên Bakur û Rojjhilatê Sûriyeyê Çîçek Kobanê têkildarî gefên rayedarên dewleta Tirk ên li ser Bakur û Rojhilatê Sûriyeyê, Peymana 10’ê Adarê û rewşa li Sûriyeyê nêrînên xwe anîn ziman.
Çîçek Kobanê anî ziman ku dewleta Tirk dixwaze entegrasyon bi awayê Rêveberiya Xweser û QSD hebûna xwe bi dawî bikin pêk were û got, “Ev jî rastiya dewleta Tirk e. Ev ji bilî nakokî û alozî zêde bibin ti feydeyeke xwe nîne. Pêwîstiya gelên Sûriyeyê bi aştî, azadî, wekhevî û demokrasiyê heye. Lê weke tê dîtin HTŞ’ya piştî hilweşîna rejîma Baas xwe kir desthilat van xisûsên girîng ji xwe re nake derd. Dixwaze mîna rejîma berê tekperestiyê li ser gel û baweriyan ferz bike. Bêguman ev pêkanîn wê bi xwe re ti çareseriyekê neynin. Eşkere ye ku yên nahêlin Peymana 10’ê Adarê bikeve meriyetê jî HTŞ û Dewleta Tirk e. Hewl didin bi gef û êrîşên curbicur vê li ser gelê Kurd û gelên din bidin pêkanîn. Lê divê her kes zanibe ku gel jî êdî ne gelê berê ne.”
Çîçek Kobanê diyar kir li Sûriyeyê ji bilî sîstemeke nenavendî ya li ser esasê demokrasî û azadiyê tiştekî din nikare bibe çareserî û ev anî ziman, “Li deverên di bin kontrola HTŞ’ê de her roj bi dehan mirov tên qetilkirin. Bi heman rengî zext û êrîşên li hember jinan berdewam dikin. Ew çeteyên kes nizane ji ku derê hatine li ser gel û baweriyên qedîm ên Sûriyeyê her cure hovîtiyê dikin. Li ser vê jî rayedarên Tirk daxwaza çekberdanê ji hêzên QSD’ê dikin. Hêzên QSD’ê û YPJ’ê parastina gelên herêmê û jinan dikin.”
Çîçek Kobanê got, piştî ewqas berdêlên giran wê gelên herêmê, şervan û gaziyên wan heya dawiyê destketiyên xwe biparêzin û wiha domand, “Divê her kes zanibe QSD û YPJ, her wiha Rêveberiya Xweser a Bakur û Rojhilatê Sûriyeyê ji bo welatekî hemû gel û bawerî bi xwişk û biratî tê de bijîn hîmên herî esasî ne. Em ê ti carî van ferzkirinan qebûl nekin. Em ê tiştekî berjewendiyên gelan û jinan têde nînin nepejirînin. Em hêza xwe ji şehîdên xwe, ji fikir û bîrdoziya Rêber Apo ya dibe dengê heqîqet û rastiyê digirin.”
Di dawiya axaftina xwe de Çîçek Kobanê got, “Têkoşîn û berxwedana me jî ji bo mirovatiyê ye. Em ê timî xwişk û biratiya gelan biparêzin. Qet em ê nehêlin ti kes zîhniyeteke paşverû ya jinan dike nav çar dîwaran, îradeya jinan nas nake li ser me ferz bike. Ji bo jiyaneke azad a di pêşengiya jinan de ya li ser esasê xwişk û biratiya gelan ji niha û şûn ve jî weke gaziyên şer çi pêwîst bike em ê bikin. Bila gumana ti kesî nebe, em ê teqez hêvî û armancên şehîdên xwe pêk bînin.”
