Hêzên Ewlekariya Hundirîn- Heleb vê sibehê der barê êrişên dawên ên ser taxên Şêxmeqsûd û Eşrefiyê de daxuyaniye weşand.
Di daxuyaniyê de hate gotin: “Hêzên Ewlekariya Hundirîn-Heleb bi rêya berpirsa giştî ya Hêzên Ewlekariya Hundirîn Axîn Nûcan diyar dikin ku taxên Şêxmeqsûd û Eşrefiyê ji nêzî 4 mehan de di bin dorpêçekeke giran de ye ku komên girêdayî wezareta parastinê ya demkî bi taybetî yên destekê ji Tirkiyeyê digirin ferz kiriye.”
Di daxuyaniyê de hat destnîşankirin ku hemwextî dorpêçêkê kiryarên provokatîk ên li dijî her du taxan didomînin û hat gotin “Armanca van kiryaran ew e ku me bikişînin nava rageşiyeke çekdarî. Ev jî gefeke rasterast li ser ewlehiya herêmê dixwe. Di demekê de ku hêzên me ji bo xurtkirin ewlehî û aştiyê de kar dike, ev kiryar jî di çarçoveya hewlên binpêkirina agirbesta di navbera Hêzên Ewlekariya Hundirîn û hikumeta veguhêz a Sûriyeyê de hatiye îmzekirin têne kirin.”
Hêzên Ewlekariya Hundirîn-Heleb hemû tawanên li dijî wan ku dibêjin ew bûne sedema pevçûnên dawîn red kirin û gotin “Hêzên me di çarçoveya mafê parastina rewa de bersiva jêderên êrişan dan. Tevî hewldanên me yên domdar ên aramkirina rewşê û pêşîgirtina li şer jî, lê komên dijber ji 4 aliyan ve êrişên berfireh li dijî taxên navborî kirin. Di encamê de rewşa ewlehiyê aloz bû.”
Di dawiya daxuyaniyê de hat destnîşankirin ku Hêzên Ewlekariya Hundirîn-Helebê dê pabendî agirbestê bin, lê diyar kir ku eger gef li ser ewlehiya herêmê û silametiya welatiyan werin kirin, ew amade ne bersivê bidin. Hate gotin: “Em dê xebata xwe ya parastina ewlehiyê bidomînin. Em her timî hewla çareseriyên aştiyane bi rêya diyalog û lihevhatina bi hemû aliyên têkildar re dikin.”
Komên girêdayî hikumeta veguhêz duh êrişî taxên Şêxmeqsûd û Eşrefiyê kirin. Di encamê de jinek şehîd bû û 17 sivîl û 6 endamên Hêzên Ewlekariya Hundirîn birîndar bûn.
Hêzên Ewlekarya Hundirîn-Helebê bersiva êrişan dan.
