Yekîtiya Jinên Elewî yên Demokratîk (YJAD) têkildarî komkujiyên li Parîsê li dijî Kurdan hatine kirin, daxuyaniyek nivîskî da. Di daxuyaniyê de hate diyarkirin ku Parîs ji bo gelê Kurd ne tenê bajarek e, di heman demê de navê êşan, şîn û komkujiyên ku hesabê wan nehatine pirsîn e.
YJAD’ê destnîşan kir ku qetilkirina Sakîne Cansiz, Fîdan Dogan û Leyla Şaylemez a di 9’ê Çileya 2013’an de, ne komkujiyeke ji rêzê ye û diyar kir ku bi vê komkujiyê têkoşîna azadiyê ya jinên Kurd û îradeya berxwedanê ya gelê Kurd hatiye hedefgirtin.
Di daxuyaniyê de hate ragihandin ku hîna edalet pêk nehatiye û hate diyarkirin ku ev polîtîkaya bêcezatiyê rê li ber êrîşên nû vedike. Hate bibîrxistin ku li ber Navenda Çandê ya Kurd a Ahmet Kaya 23’yê Kanûna 2022’yan Evîn Goyî, Mîr Perwer û Abdûrrahman Kizil hatin qetilkirin.
YJAD’ê bilêv kir ku êrîşên navborî êrîşên nîjadperest û polîtîk in û destnîşan kir ku bêdengiya dewletan kujeran bi cesaret dike. Hate diyarkirin ku heya edalet pêk tê û rastî derdikevin holê, wê têkoşîn bidome.
YJAD’ê bang li hemû raya giştî, hêzên demokratîk, jinan û her kesê xwedî wijdan kir ku 10’ê Çileyê tevlî meşa mezin a li Parîsê bibin.
