Merasîma bîranînê li Goristana Şehîd Dilgeş û Şehîd Berxwedan ji bo şehîdên meha Çile û Sibatê hat lidarxistin. Di merasîma ku ji bo bîranîna şehîd Zerdeşt, Berxwedan, Azad, Enwer, Êzdîn, Ferhat, Pîr Hemîd, Kawar û Cîlo pêk hat de, pêşî deqeyek rêzgirtin ji bo giyanê şehîdan hat girtin. Piştre ji aliyê dayikên şehîdan ve find hatin pêxistin û axaftin hatin kirin.
Li ser navê Fermandariya YBŞ û YJŞ’ê, Rêber Feqîr axivî û sersaxî ji malbatên şehîdan re xwest. Feqîr, di axaftina xwe de wiha got: “Hevalên me yên ku di encama êrîşên hovane yên dewleta Tirk de şehîd bûn, ji roja fermanê heta kêliya şehadetê ji bo parastina nirxên civaka xwe di nava têkoşînê de bûn û qet gavekê paş ve nevêtin. Em ê têkoşîna hevalên xwe ya ji bo azadî û xweseriya Şengalê bi serketinê bi encam bikin. Êrîşên li ser gelê me û bi taybetî li ser civaka Êzidî hîn bi dawî nebûne. Dijmin dixwaze civaka me tune bike. Wek şagirtên Şehîd Zerdeşt, Berxwedan û hemû şehîdên din, em ê bi awayekî pir xurt bersiva her êrîşekê bidin, ku hebûna civaka me bixe metirsiyê.”
Rêber Feqîr, her wiha bal kişand ser girîngiya rêxistinbûna Êzidiyan û got: “Di dîroka Êzidiyan de cara yekeme ku rêxistineke wiha ya parastinê hatiye avakirin, ji ber vê yekê êrîşî me dikin. Şehîdên me ne tenê ax parastin bi sedan ciwan perwerde kirin. Em careke din soza tolhildanê nû dikin. Bila xayîn baş bizanibin ku ew ê hesabê îxaneta xwe bidin.“
Li ser navê Saziya Malbatên Şehîdan, Berfê Eliyas jî axivî û girîngiya xwedîderketina li şehîdan anî ziman. Eliyas got: “Zarokên me ji bo parastina axa xwe canê xwe dan. Em wek dayik heta dawiyê li pişt şervanên xwe ne û kengî pêwîst be, em amade ne mîna şehîdên xwe canê xwe di vê dozê de bidin.”
Merasîm piştî nîşandana sînevîzyonekê li ser jiyan û têkoşîna şehîdan bi dawî bû.
