Milîtanê Apoyî Celal Amed (Celal Baymiş) ku ji bo dermankirinê li Bakur û Rojhilatê Sûriyeyê bû, di 10’ê Çileyê de ji ber krîza dil şehîd bû. Ji bo Baymiş, li Mala Taziyê ya Şemrexê ya li navçeya Rêzana Amedê taziyeyek hate danîn. Taziye, bi pêşengiya Komeleya Alîkarî, Piştevanî, Yekîtî û Çandê ya bi Malbatên ku Xizmên xwe di Dergûşa Şaristaniyan de Windakirine (MEBYA-DER), bi tevlîbûna nûnerên partiyên siyasî û rêxistinên girseyî yên demokratîk bi girseyî hate ziyaretkirin.
Hevserokê MEBYA-DER’ê Ramazan Dengiz di taziyê de axivî û got: “Jiyana hevalê Celal a 49 salan di nav têkoşînê de derbas bû. Mîrateyeke mezin ji me re hişt. Heta nefesa xwe ya dawî li ber xwe da. Tiştê ku 49 salan ew li ser piyan girt û hişt ku di nav têkoşînê de cih bigire, xwedîbûna îdeolojiyeke saxlem bû. Em ê her tim di riya wan de têkoşîna xwe bidomînin. Em li ber berxwedana wan bi rêzdarî bejna xwe ditewînin. Em ê tu carî wan ji bîr nekin.”
Piştî axaftinan dirûşma “Şehîd namirin” hate berzkirin û taziye wê sibê jî bidome.
