Bi sedan kesên ji Qamişloyê bi rê ketin, ji bo piştgiriyê bidin berxwedana li Hesekê bi konvoyeke ji wesayitan bi rê ketin.
Konvoy bi komên din ên ji Amûdê û Dirbêsiyê bû yek û bi hev re ber bi Hesekê ve diçe.
Girseya gel serê sibehê li Qamişloyê li hev kom bû û li Xaçerêya Yûsûf Gulo li hev civiya. Nûnerên partiyên siyasî, endamên saziyên civaka sivîl û parêzer jî di nav de bi sedan kes li hev civiyan û ji bo berxwedanê bang kirin.
Xwepêşandêran tim û tim dirûşmên “Bijî berxwedana Rojava”, “Bijî berxwedana Kobanê” û “Bijî berxwedana Hesekê” peyama piştgiriyê dan.
Ji beşdarên konvoyê Ibtîsam Hisên anî ziman ku Şoreşa Rojava sala 15’an li pey xwe hişt û destnîşan kir ku gelê Kurd ji bo jiyaneke azad û wekhev têkoşîna xwe dewam dike. Ibtîsam Hisên got, “Weke gelê Qamişloyê em tevlî çalakiya li Hesekê dibin. Jİ bo piştgiriyê bidin berxwedana li Rojava û parastina destketiyan em li wir in.”
Ibtîsam Hisên diyar kir ku seferberia ji aliyê rêveberiya xweser ve hate ragihandin ne tenê li Rojava li çar parçeyên Kurdistanê û cîhanê deng veda û ragihand ku gelê Kurd li hemberî dagirkerî, zilm û hewldanên qirkirinê rabû ser piyan. Her wiha bang li sazî û dewletên navneteweyî kir ku xwedî li biryar û qanûnên xwe derkevin û mafên gelan biparêzin.
Ji beşdaran Îsam Ehmed jî got, “Em diçin ku piştgiriyê bidin gelê xwe. Em ê li ser şopa şehîdên xwe bin. Moralê me bilind e, Kurd wê timî hebin.” Cemîl Hesen jî got, “Gelê Kurd divê dest bide hev, em şoreşa xwe bigihînin asta herî bilind.”
Nadra Mihemed jî got, “Em zarokên xwe biparêzin, piştgiriyê bidin hêzên xwe yên asayîşê. Xaka me wê di destê Kurdan de bimîne. Kes nikare çavên Kurdan bitirsîne. Em hene û em ê her tim hebin.”
