Li Tirkiyeyê êş û derdê koçberan naqede. Yek ji wan jî Asmaa Hachem a ji Fasê ye ku ji bo keça xwe ya ji aliyê Xizmetên Civakî ve bi zorê jê hatiye standin têdikoşe. Asmaa Hachem 4 roj in li Navenda Vegerandinê ya Selîmpaşa tê ragirtin. Hevseroka Giştî ya Komeleya Mafên Mirovan (ÎHD) parêzer Eren Keskîn ji bo Hachem neyê dersînorkirin ketiye dewrê. Eren Keskîn li ser mijarê ji ANF’ê re axivî.
TIŞTEK NEMA KU BI SERÊ HACHEM NEHAT
Asmaa Hachem di sala 2017’an de ji bo betlaneyê ji Fasê hat Tirkiyeyê, lê belê tiştek nema ku bi serê wê nehat. Di rojên destpêkê de çenteyê wê hate dizîn û ji ber ku wesayitekê lê da, lingê wê şikest. Piştî ku rehet bû bi demê re li Stenbolê bû xwedî derdorekê. Hachem ji bo kar bike û mafê rûniştinê serlêdan kir, lê nehate qebûlkirin. Di 8’ê Adara 2021’ê de keça wê ya bi navê Fatîma Alya ji dayik bû. Bi piştgiriyê li Kasimpaşayê malek kirê kir û dest bi karê paqijiyê kir. Jiyana Hachem piştî pandemiyê bi krîza aboriyê re hîn giran bû. Ji ber ku kirêya xanî gelekî biha bû nekarî bide, lewma ji aliyê xwediyê xanî jî ji malê hate avêtin. Mîna ku ev têrê nake, li ser îxbarekê ew birin Qereqola Beyoglûyê û keça wê bi zorê jê hate standin. Keça wê Alya birin saziyeke Midûriyeta Xizmetên Civakî û ji wir jî radestî malbatekê hate kirin. Hachem ji bo karibe keça xwe werbigire bi mehan e hewl dide. Herî dawî ji aliyê Qereqola Beyoglûyê ve beriya 4 rojan ji bo bê dersînorkirin birin Navenda Vegerandinê ya Selîmpaşayê.
‘QANÛN LI ALIYEKÎ EV YEK JI ALIYÊ HESTEWARÎ VE REWŞEKE METIRSÎDAR E’
Hevseroka Giştî ya ÎHD’ê Eren Keskîn ku têkoşîna Asmaa Hachem a ji bo keça xwe dît û ji bo neyê dersînorkirin kete dewrê, anî ziman ku bêyî daxwaz û destûra Hachem keça wê bi zorê jê hate standin, destpêkê radestî Saziya Sêwiyan a Zarokan, ji wir jî dan malbatekê. Keskîn anî ziman ku Hachem bi mehan e têdikoşe ji bo karibe zaroka xwe werbigire û got, “Asmaa naxwaze zaroka xwe bide û dibêje ku dikare lê binere. Qanûn li aliyekî ev yek ji aliyê hestewarî ve tiştekî gelekî metirsîdar e. Zilm e ku zarokek bêyî daxwaza dayikê jê bê standin. Hem ji bo zarok hem jî ji bo dayikê travmayeke mezin e. Ji xwe dayikê dema serî li me da diyar kir ku dema zaroka wê jê hate standin felç derbas kir, porê wê jî weşiya. Lê belê zarok tevî vê yekê jî ji dayikê hate standin û radestî malbatekê hate kirin. Destûr ji Asmaa re hatiye dayin ku tenê mehê carekê keça xwe bibîne, ev yek jî ji bo wê bûye hêviyeke mezin. Em jî hewl didin ku ji têkoşîna wê re bibin alîkar. Lê belê ji ber ku belgeyên wê yên pêwîst nîne nekarî wekaletê bide me. Herî dawî em hîn bûn ku birine Navenda Vegerandinê ya Selîmpaşayê.”
EREN KESKÎN BANG LI WEZÎRA MALBATÊ KIR
Keskîn diyar kir ku dersînorkirina dayikeke ji bo wergirtina zaroka xwe têdikoşe binpêkirina mafên mirovan e û bangeke bi vî rengî li Wezîra Xizmetên Civakî û Malbatê Mahînûr Ozdemîr Goktaş kir, “Vî karê vegerandinê tavilê rawestînin. Ji bo Asmaa Hachem zaroka xwe werbigire ya pêwîst tavilê bikin.”
