Li gorî xebata lêkolerên ku di bin banê Enstîtuya Akademiya Biyolojiyê ya Romanyayê de dixebitin û di kovara Frontiers in Microbiology de hatiye weşandin, di tebeqeyeke qeşayê ya 5 hezar salî de li şikefta Grotte de Scărișoara ya li Transîlvanyayê, cureyekî bakteriyê yê bi navê “Psychrobacter SC65A.3” hat dîtin.
Ev bakteriya ku dikare di hawirdorên sermaya zêde de bijî (ekstremofîl), li hemberî nêzî 10 antîbiyotîkên cuda, di nav de sefalosporîn û florokînolonên ku îro wekî çareya dawîn tên bikaranîn, berxwedan nîşan da.
Lêkoleran eşkere kir ku ev cure, yekemîn mînaka Psychrobacter e ku hatiye diyarkirin ku li ber antîbiyotîkên navborî berxwedêr e.
Di analîza genomê de her wiha nêzî 600 genên ku fonksiyonên wan nayên zanîn û hin genên xwedî taybetmendiyên antîbakteriyel, antîfungal û antîvîral hatin tespîtkirin.
Hat diyarkirin ku bakterî ji ber berxwedana dermanan a pirjimar, dikare li dijî hin patojenên ku wekî koma “ESKAPE” têne polînkirin û di nexweşxaneyan de dibin sedema enfeksiyonên giran jî bi bandor bibe.
Zanyaran diyar kir ku ev vedîtin ji aliyekî ve ronahiyê dide kokên dîrokî yên berxwedana antîbiyotîkê, ji aliyê din ve jî ji bo pêşxistina antîbiyotîkên nû hêvî dide. Lê belê, hişyarî hat dayîn ku di rewşa belavbûna bakteriyê ya bêkontrol de dikare rîskên potansiyel jî bihewîne.
