Hikumeta demkî ya Sûriyeyê ragihand ku Nexweşxaneya Wetenî ya Şedadê ya gundewarê Hesekê ketiye xizmetê, dest bi pêşwazîkirina serdanan kiriye, beşên ambulancê, dermanxane û klînîkên jinan aktîv kirine û xizmetên giştî ji bo xelkê herêmê re pêşkêş dike.
Lê Nexweşxaneya Şedadê ku berê bi navê “Nexweşxaneya Gel” dihat naskirin ji aliyê Desteya Tenduristiyê ya Rêveberiya Xweseriya Demokratîk ve bi awayekî fermî di 6ˊê Cotmeha 2022ˊyan de hatibû vekirin û bû nexweşxaneya yekemîn li herêma başûrê Hesekê, xizmet ji zêdetirî 500 gund re ku tê de nêzî 300 hezar kes hebûn pêşkêş dikir.
Di 2014ˊan de di dema dagirkirina gundewarê başûrê Hesekê ji hêla çeteyên DAIŞˊê ve, çeteyan ew nexweşxane kiribû barege, ji sedî 90 ji nexweşxaneyê hatibû wêrankirin. Lê li gorî wê demê, Hevserokê Meclisa Rêveber a Rêveberiya Xweseriya Demokratîk a Herêma Cizîrê Talet Yûnis di merasîma vekirinê de gotibû ku nêzî milyonek û nîv û 14 hezar dolar li çêkirin û alavên nexweşxaneyê çûye.
Di merasîma vekirinê ya wê wextê de, xelkê herêmên Şedadê, Erîşa, Mergede û gundewarê wan, nûnerên ji Desteya Tenduristiyê, Meclisa Rêveber a Herêma Cizîrê, saziyên sivîl û leşkerî û aliyên civakî amade bûn.
Mûdîrê nexweşxaneyê Husam El Elî bû û di vekirinê de diyar kiribû ku nexweşxane bi 4 beşan; ambulanc, laboratuwar, klînîkên tibî û beşa welidandinê de dest pê kir û wê beşên radyolojî û yên din li gorî peydakirina xebatkar û alavan jî werin vekirin. Elî gotibû ku di nexweşxaneyê de 8 bijîşkên giştî û 6 pispor, hemşîre, 2 laboratuwar û 2 ambulanc hene.
Bi van rastiyan re, çavdêr pirsan li ser feydeya ragihandina vekirina nexweşxaneyekê dikin ku bi salan berê hatibû vekirin û xebitandin.
