OHD: 7 zarok bi hinceta tevli Newrozê bûne hatine girtin û êşkence dîtin

Komîsyona Mafên Zarokan û Bîrê ya Şaxa Komeleya Hiqûqnasên ji bo Azadiyê (OHD) ya Stenbolê, li avahiya xwe ya Beyogluyê, têkildarî girtin û binçavkirinên piştî pîrozbahiya Cejna Newrozê daxuyanî da. Daxuyanî ji aliyê endama komîsyonê Meryem Agar ve hate xwendin.
 
Meryem Agar anî ziman ku Newroz ne tenê rojekî tê pîrozkirin, çand, bîr û dîroka gelê Kurd e û wiha axivî: “Newroza 2026’an jî bi dirûşma ‘Newroza azadiyê’ hat pîrozkirin. Milyonan kes tev li Newrozan bûn û dengê xwe bilind kirin. Gel li qada Newrozê sekna xwe ya aştiyê aşkere kir. Li Newrozan ti bûyer derneket. Lê piştî Newrozê me dît ku refleksa dewletê ya ewlehiyê hê jî berdewam dike. Dewlet sekna aştiyê wekî ‘gefa siyasî’ dît û bi sedan kes hate binçavkirin.”
 
Di berdewama daxuyaniyê de Meryem Agar destnîşan kir ku li Stenbolê 15 zarok bi hinceta tevîi Newrozê bûne hatine binçavkirin û wiha pê de çû: “Ji 15 zarokan 4 jê bi hinceta ‘propangandaya rêxistinê kirine’ hatin girtin, ji bo 2 zarokan jî biryara hefsa malê hate dayin. Li Îzmîrê zarokek bi hinceta ‘Bi lêva xwe hin tişt gotine’ li Êlihê zarokek bi hinceta ‘Li ser dikê stran gotiye’, li Amedê jî zarokek hatiye girtin. Bi giştî 7 zarok di girtîgehê de ne, 2 zarok jî di hefsa malê de ne.”
 
Di dawiyê de Meryem Agar diyar kir ku girtina zarokan li dijî hiqûqê ye û got: “Divê mafê zarokan were parastin. Sûcê ku zarok jê tên sûcdarkirin nayên qebûlkirin. Zarokên ku hatine binçavkirin îşkence li wan hatiye kirin. Tu awayî êşkence nayê qebûlkirin. Li gorî peyamana Netewên Yekbûyî (NY) di xala 37’emîn de diyar e ku îşkenceya zarokan li dijî mirovahiyê ye. Em wekî OHD’ê ji bo faîl derkevin holê me serlêdan kir. Em ê heta dawiyê li pey doza zarokan bin.”