Konferansa jinan a navneteweyî bi pêşengiya Tevgera Jinên Kurd a Ewropayê (TJK-E) û Yekîtiya Jinên Kurd a Swîsreyê (YJK-S) bi dirûşmeya “Aştî Bêyî Me Nabe” li bajarê Zurîhê ya Swîsreyê dest pê kir. Nêzîkî 180 delege ji her çar perçeyên Kurdistanê û gelek welatên din beşdarî konferansê bûn.
Konferans li Rote Fabrik a li Zurîhê bi axaftina vekirinê ya siyasetmedar Dîlan Dîrayet Taşdemîr dest pê kir. Piştre jî Endama Şandeya Îmraliyê ya DEM Partiyê Pervîn Buldan, Senatora berê ya Kolombiyayê û muzakerevana aştiyê Victoria Sandino û girtiya siyasî ya ji welatên Baskê Kizkitza Gil de San Vicente jî axivîn.
PERVÎN BULDAN: BÊYÎ JIN AŞTÎ NABE
Pervîn Buldan, bal kişand ser rola bingehîn a ku jin di pêvajoyên aştiyê de dilîzin û diyar kir ku jin herî zêde ji şeran bandor dibin û ji ber vê yekê divê bi awayekî çalak beşdarî pêvajoyên aştiyê bibin.
Pervîn Buldan, behsa astengiyên li pêşiya beşdarbûna jinan di pêvajoyê de kir û got ku Rêber Apo girîngiyek mezin dide tevlîbûna jinan. Pervîn Buldan got, “Birêz Ocalan girîngiyeke mezin dide û di wê baweriyê de ye ku jin dê di pêvajoya entegrasyona demokratîk de bibin hêzeke pêşeng.”
Pervîn Buldan, diyar kir ku rêxistinbûna jinan a li her qadê dê tevkariyê li aştiyê bike û got, “Em dixwazin aştî bi civakî bibe. Di erdnîgariya me de cihê jinan tune ye. Têkoşîna jinan tê paşguhkirin. Çawa ku Kurd tên înkarkirin û paşguhkirin, jin jî rastî heman zîhniyetê tê. Lê di çaryeka sedsala dawî de bi taybetî di şert û mercên şer de jinên Kurd nîşanî hemû cîhanê dan ku têkoşîna maf a ji bo jinan çiqas girîng e. Yek ji mînakên herî şênber Rojava bû.”
Pervîn Buldan, da zanîn ku di pêvajoya aştiyê de, qonax gihiştiye sererastkirina qanûnan û destnîşan kir ku pêdivî bi misogerkirina mafên jinan heye. Pervîn Buldan, diyar kir ku azadiya jinan şertek bingehîn a aştiyê ye.
VİCTORİA SANDİNO: JINÊN KURD ÎLHAM DIDIN
Victoria Sandino, jî got ku têkoşîna jinên Kurd îlham dide jinên cîhanê û behsa girîngiya rola jinan a di pêvajoya aştiyê ya di navbera hikûmeta Kolombiya û FARC’ê de kir. Victoria Sandino got, “Jinan, bi taybetî dayikan, di sererastkirina zirara kûr a şer de roleke diyarker lîstin. Ji bo ku ev ked û tecrûbe di pêvajoyên muzakereyê de were nîşandan, me gelek têkoşîn kir. Lê belê, ev hewldan di rêziknameyên qanûnî yên pejirandî an jî derbasbûyî de têra xwe nehatine nîşandan.”
Victoria Sandino, destnîşan kir ku divê jin di navenda aştiyê de cih bigirin, an aştiya ku pêk were dê kêm bimîne. Victoria Sandino, diyar kir ku tevlîbûna çalak a jinan ji bo aştiyek mayînde, girîng e.
DE SAN VİCENTE: DIVÊ OCALAN AZAD BE
Piştre jî endama Tevgera Rizgariya Neteweyî ya Baskê Kizkitza Gil de San Vicente axivî. Kizkitza Gil de San Vicente, axaftina xwe bi daxwaza azadiya Rêber Apo dest pê kir û behsa rola girîng a ku jinan di têkoşîna Baskê de lîstine, kir.
Kizkitza Gil de San Vicente, diyar kir ku jinan hem di têkoşîna neteweyî de û hem jî ji bo mafên xwe xwe birêxistin kirine. Kizkitza Gil de San Vicente, got ku jin vê pêvajoyê bi rêxistinbûna xwe ya xweser birêve dibin û got ku destkeftiyên ku hatine bidest xistin encama vê têkoşîna domdar e.
Konferans wê bi panel û atolyeyan tevahiya rojê bidome.
