Vê êvarê, Tevgera Ciwanên Şoreşger bi tevlêbûna şêniyên Til Temirê meşek girseyî ji bo piştgirî û hevgirtina bi Yekîneyên Parastina Jin (YPJ) re û daxwaza naskirina YPJˊê bi awayekî fermî di avasaziya nû ya artêşa Sûriyeyê de li dar xist.
Meş ji kola Eilaf a bajêr dest pê kir. Di meşê de al û wêneyên YPJˊê hatin hildan û diruşmên balê dikişînin ser rola jinan di parastina herêmê û pêwîstiya parastina deskeftiyên wan de hatin hildan û berzkirin.
Meş li ser rêya M4 heta bi Çerxerêya Qendîlê ya li têketina başûrê bajêr çû. Li wir veguherî mitîngê. Di mitîngê de ciwana bi navê Nalîn Seydo axivî û got: “YPJˊê di salên şer de hêza xwe ya parastina civakê û parastina nirxên azadî û rûmetê de îsbat kir. Her pêvajoyek ji bo jinûve sazkirina artêşa Sûriyeyê yan jî avasaziyek nû ya leşkerî divê YPJˊê bi awayekî fermî were naskirin.”
Nalîn da zanîn ku “Nabe fedekariyên YPJˊê werin paşguhkirin bi taybet piştî rola ku li dijî rêxistinên tundraw lîstiye û parastina deverên Bakur û Rojhilatê Sûriyeyê kiriy8e. Naskirina YPJˊê naskirina vîna jina azad û têkoşîna wê ya rewa ye.”
Nalîn di dawiyê de got: “Jinê şiyana xwe ya lîstina rola pêşengî di revahî waran de îsbat kir û her projeyek ji bo avakirina Sûriyeya nû bêyî beşdariya jina azad û hêza wê ya leşkerî û rêxistinî bi ser nakeve.”
