Şaredariya Kobanê di çarçoveya parastina zeviyan û erdên çandiniyê de li hemberî şewatên muhtemel seferberiya tîmên agirkujiyê yên lezgîn ragihand. 10 tîmên agirkujiyê wê di çarçoveya seferberiyê de li bajar û herêmên weke Kobanê, Şêran, Bilik, Taşlûg, Cirin û Tilxezalê 24 saetan amade bin.
Seroka Şaredariya Kobanê Elmaz Romî têkildarî seferberiya tîmên agirkujiyê ji ajansa me re axivî. Elmaz Romî diyar kir ku ji bo ku gelê herêmê bi silametî zeviyên xwerakin divê ew parastina wan bikin. Elmaz Romî da zanîn ku li hemberî şewatên muhtemel parastina erd û zeviyan bes ne berpirsiyariya şaredariyê ye di heman demê de divê gel jî berpirsiyariyên dikeve berê wan bi cih bînin û ev yek anîn ziman: ‘’Em her sal weke Şaredariya Kobanê ji bo parastina erd û zeviyan seferberiya tîmên xwe yên agirkujiyê radigihînin. 10 wesayitên me yên agirkujiyê hene û li navendên cuda 24 saetan di xizmetê de ne. Her wiha wê nimreya tîman jî li herêmê werin belavkirin ku gel bikarine yekser xwe bigihîne tîman.’’
Elmaz Romî piştre bang li gel kir ku li hembwî şewatên muhtemel berpirsiyariyên bi cih bînin û axaftina xwe bi van gotinan bi dawî kir: ‘’Divê gelê me jî bi me re bibe alîkar û ew jî ji bo parastina erdên xwe di nava seferberiyê de bin. Her wiha divê welatî jî ji bo pêşîlêgirtina şewatên ku derkevin traktorên xwe amade bikin. Em ê bi gelê xwe re erd û zeviyên xwe biparêzin. Jixwe tîmên me tim amade ne.’’
Endamê tîma Kobanê Beşar Haçikê jî ku ev 12 sal in karê agirkujiyê dike, anî ziman ku divê gel jî bi wan re di nava seferberiyê de be ku ew bi hev re parastina zevî û axa xwe bikin. Beşar Haçikê piştre bang li gel kir ku dema dengê sîrenên agirkujiyê hat divê demildest rê bidin wan ku ew xwe bigihînin cihê şewat lê derketiye.
