Hejmara meha Hezîranê ya Rojnameya Komînal a li Ewropayê tê weşandin, derket. Rojnameyê hejmara xwe ya çaremîn li gel nivîsa Mûstafa Karasû ya bi sernavê ‘’Civaka birêxistî şert e!’’ derxist.
Mûstafa Karasû di nivîsa xwe de balê dikşîne ser girîngiya civaka birêxistî û jiyanîkirina komunê û bi van gotinan pênaseya kapîtalîzm û civaka ku afirandiye, dike:
‘’Kapîtalîzm pergaleke wisa ye ku civakîbûnê belav dike û têk dibe. Ji ber wê yekê jî dijminê mirovahiyê ye. Civakîbûn, di rewşa nexweşê li ber mirinê de ye.’’
Mûstafa Karasû di nivîsa xwe de diyar dike ku rizgarî jî rakirina civakan ali ser piyan a bi rêya komunalîteû komunan e.
‘DAXUYANIYÊN BAHÇELÎ NAYÊN QEBÛLKIRIN’
Karasû ji bo Tirkiyeyê nirxandina ‘’Tirkiye ji hemû aliyan ve di nava kaoseke polîtîk de ye’’ dike û balê dikşîne ser sabîtiya di dema pêvajoya aşitiyê û berdewama wê de.
Her wiha Mûstafa Karasû balê dikşîne ser daxuyaniyên Devlet Bahçelî yên binakok jî û van yekan tîne ziman: ‘’Nivîsa li ser navê Devlet Bahçelî ya di rojnameya Turkgunê de derdikeve, di nava xwe de gelek nakokî dihewand. Mijara nivîsê li ser tesfiyekirina Tevgera Azadiyê bû. Pozîsyona têkildarî Rêbertî jî weke rolstandina di tesfiyeyê de dihat îfadekirin. Eşkere ye ku ev yek bi tu awayî nayê qebûlkirin.’’
JI BO BAŞTIR FÊMKIRINA MANÎFESTOYÊ
Rojnameya Komînal, di her sê hejmarên xwe yên destpêkê de Manîfestoya Civaka Komunal a Demokratîk weşandibû. Rojnameyê di hejmara xwe ya çaremîn de jî cih dide hin daxuyaniyên têkildarî binsernavên Manîfestoyê.
Her wiha rojnameyê notên hevdîtina 24’ê Gulanê ya Heyeta Îmraliyê ya HDP’ê ya bi Rêber Apo re jî weşand û di bergê dawiyê de jî cih dide helbesta Ebdula Peşêw ya bi navê ‘’Ta ku çirayê megeş nebe.’’
