Komîteya Wezîran a Konseya Ewropayê ji bo nirxandina biryarên têkildarî “Mafê Hêviyê” yên Dadgeha Mafên Mirovan a Ewropayê (DMME) wê di navbera 9-11’ê Hezîranê de bicive.
Parêzer Mustefa Şêx Mislim beriya vê civînê ji ANF’ê re axivî. Mislim bal kişand ser şert û mercên heyî yên Rêber Apo lê têne ragirtin û destnîşan kir ku çareseriya pirsgirêkên li Kurdistanê û Rojhilata Navîn bi azadiya Rêber Apo dibe.
Mustefa Şêx Mislim anî ziman ku tevî bangên aştiyê û pêvajoya nû, şert û mercên giran ê Rêber Apo hîn jî didome û got, “Di van 27 salan de şert û mercên Rêber Apo neguherîne. Divê parêzer, rojnamevan û heyet bi awayekî asayî bikaribin serdana Rêber Apo bikin. Lê heta niha şertên giran wekî berê berdewam in.”
Mislim diyar kir ku mafê hêviyê mafek bingehîn e û got, “Mafê hêviyê mafekî esasî ye. Tevî şert û mercên heyî jî Rêber Apo pêvajoya aştiyê bi rêve dibe. Rêbazên çareseriya pirsgirêkan û kilîda aştiyê li ba Rêber Apo ye.”
Mislim derbarê civîna Komîteya Wezîran de jî got ku divê biryarên hatine girtin werin bicih anîn û wiha domand, “Em hêvîdar in ku şaşitiyên berê dubare nebin. Divê komîte li gorî qanûnê tevbigere û mafê hêviyê ji bo Rêber Apo nas bike. Azadiya fîzîkî ya Rêber Apo divê bê pêkanîn.”
Mislim her wiha bal kişand ser girîngiya azadiya Rêber Apo ji bo aştiya herêmê û wiha axivî, “Rojhilata Navîn di nav aloziyan de ye. Rêber Apo her tim ji bo aştiyê hewl daye. Azadiya wî dê rê li pêşiya şeran bigire û bibe hêza belavkirina aştiyê.”
Mislim bang li saziyên Ewropayê kir ku li gorî prensîbên hiqûqî tevbigirin û got, “Em dixwazin ku komîte bi awayekî serbixwe tevbigere, ne li gorî berjewendiyên siyasî. Divê maf û hiqûq bêne pêkanîn û Rêber Apo demildest bi awayekî fîzîkî were azadkirin.”
