Baroyên Agirî, Êlih, Çewlig, Bedlîs, Dersim, Amed, Colemêrg, Îdir, Qers, Mêrdîn, Mûş, Sêrt, Riha, Şirnex û Wanê têkildarî qanûna ‘Xurtkirina hevgirtina neteweyî û yekparebûna civakî’ ya li Civata Giştî ya Meclîsa Tirkiyeyê hate qebûlkirin, daxuyaniya hevpar dan.
Baroyan diyar kir ku şerê nêzî nîvsedsal e didome bûye sedema encamên civakî yên giran. Baroyan bi temamî bêdengbûna çekan û çareseriya pirsgirêkan a li ser zemînê hiqûq û siyaseta demokratîk weke gaveke dîrokî nirxand.
Baroyan destnîşan kir ku qanûn ji aliyê teknîka hiqûqê û çarçoveya wê ve xwedî aliyên divê bên pêşxistin e.
Di daxuyaniyê de hate diyarkirin ku aştiya mayînde tenê bi sererastkirinên hiqûqa cezayê pêk nayê û hate destnîşankirin ku pêvajo divê li ser esasê hiqûq, zelalî, demokratîkbûn û edaleta civakî were meşandin.
Baroyan her wiha bang kir ku mafên esas û azadî were xurtkirin û divê hemû beşên civakê bikarin tevlî pêvajoyê bibin.
