Têkildarî pêvajoya Aştî û Civaka Demokratîk û gav neavêtina dewleta Tirk, Endamê Têkiliyên Derve ya Wargeha Penaberan a Şehîd Rustem Cûdî (Mexmûr) Polat Çelê û Mamoste Eyşê Kara ji ajansa me ANF’ê re axivîn.
Polat Çelê, banga dîrokî ya Aştî û Civaka Demokratîk a Rêber Apo bi bîr xist û destnîşan kir ku ji destpêka pêvajoyê, heya roja îro Rêber Apo û Tevgera Azadiyê gelek gav avêtine.
Polat Çelê da zanîn ku Rêber Apo û Tevgera Azadiyê ji bo ku pêşengiyê ji pêvajoya aştiyê re bikin, gavên şênber avêtine û got: “Bi kongreyekê PKK hat fesixkirin, şer hate rawestandin, stratejiya şerê çekdarî hat guhertin û gerîlayan xwe ji Metîna kişand da ku hincetê gavavêtina dewleta Tirk nemîne. Herî dawî jî ji aliyê rêveberiya tevgerê ve hate eşkerekirin ku hêzên xwe yên veşartî jî, ji Tirkiyeyê kişandine. Hêzên ku di tunelan de jî mane, xwe ji wan tunelan jî vekişandine. Tu hincet nemaye ku dewleta Tirk êdî xwe lê bigire.”
Polat Çelê bal kişand ser nêzîkatiyên dewleta Tirk ên ku hişmendiya netewperestiyê hîna jî sor dike û got: “Dewleta Tirk hîna bi hişmendiya xwe ya netewperest dixwaze pêvajoyê li gorî berjewendiyên xwe bikar bîne. Hikûmeta AKP’ê pêvajoyê bi demê re berbelav dike, li gorî berjewendiyê xwe sûdê digire ku bikaribe desthilatdariya xwe mayînde bike. Hin gavên erênî hatibin avêtin jî, lê ji bo çareserî û aştiyeke mayînde nabe bersiv. Ew yasayên ku hatine derxistin lewaz in, têrê nakin û heta di hin milan de ji bo çareseriyê asteng in. Pêvajo êdî hatiye astek wisa ku di geşedanên herêmê de ji bo dewleta Tirk jî xeteriyan çêdike. Ev xeteriyên ku li herêmê bi pêş dikevin, di dema pêş de, wê hîn bêhtir li ser Tirkiyeyê bandor çêbike.”
Polat Çêlê îşaret bi pêngava ku ji aliyê Rêber Apo ve hatiye avêtin kir û wiha got: “Çareseriya ku Rêber Apo pêşkêş kirî, wê ji bo her kesî sûdwertir be. Gelên Kurd, Tirk û yên li herêmê hemû wê ji çareseriyê sûd werbigirin û pirsgirêkên xwe ber bi çareseriyê ve bibin.”
Mamoste Eyşê Kara da zanîn ku li ser pêvajoya ku ji aliyê Rêber Apo ve hatiye destpêkirin re du sal derbas bûne û diyar kir ku heya niha pêvajo tenê ji aliyê Rêber Apo ve hatiye meşandin.
Eyşê Kara anî ziman ku heya niha ji aliyê Tevgera Azadiyê ve gelek gav hatine avêtin û wiha pêde çû: “Heya niha bi kongreyê fesix kirina PKK’ê çêbû, ji bo bawerî çêbibe ji aliyê gerîlayan ve merasîma çek şewitandinê pêk hat, her wiha vê dawiyê gerîlayan li Herêmên Parastinê yên Medyayê xwe vekişandin. Rêber Apo ji bo pêşveçûna pêvajoyê ewqas ked da, lê li hemberî gavên ku me jimartin mixabin heya niha dewleta Tirk tu gaveke şênber neavêtiye. Li hemû cîhanê ji bo aştiyê her tim gav avêtin du alî çêdibin. Tu carî yek alî çênabin. Ji bo aştiyeke mayînde ya gelê Kurd û Tirk, pêwîste dewleta Tirk û hikûmeta AKP’ê gavên şênber biavêje.”
Eyşê Kara bal kişand ser zimanê neyînî yên rayedar û ragihandina dewleta Tirk û got: “Zimanekî heqaretê bikar tînin. Hîna jî ji Rêber Apo re dibêjin ‘Rêberê Terorîstan.’ Ev nêzîkatî nahêle ku bawerî bi pêvajoyê were. Heya niha rê li Rêber Apo nehatiye vekirin ku bikaribe xîtabî gelê Tirk bike. Eger pêşiya Rêber Apo bê vekirin û bi ragihandin, siyasetmedar, rewşenbîr û hwd bikaribe hevdîtinan bike, ez bawerim wê çareseriyek mayînde bi pêş bikeve.”
Eyşê Kara da zanîn ku bi pêşketina pêvajoyê re ev du sal in li Tirkiyeyê ji hêla aborî û siyasî ve rihetiyek heye û got: “Ji aliyê civaka Tirkî ve jî derûniyeke rihet ava bûye. Gelê Kurd û gelê Tirk jî dizane ku heqîqeta herî mezin; çareseriyek mayînde ye.”
