Endamên Komîsyona Dîplomasiyê ya Meclîsa Ciwanan a Partiya Demokrasî û Wekheviyê ya Gelan (DEM Partî) û Heyeta Ciwanên Enternasyonal 9’ê Cotmehê ji bo dîtina Rêber Apo serî li Wezareta Eldaetê dan.
Di nava heyetê de ku ji ciwanên enternasyonalîst ên ji 8 welatên cuda pêk hat, jin a ciwan a Îtalî Anna R. têgînên aştî û demokrasiyê, nêzîkatiya mirovên li Ewropayê ya li Pêvajoya Aştî û Civaka Demokratîk, komîn, sosyalîzma demokratîk û bandora Tevgera Jinên Kurd a li jinên li seranserê cîhanê vegot.
Anna R. diyar kir ku yek ji nuqteyên paradîgmaya Rêber Apo ya ku herî zêde bandor lê kir, derfetê avakirina jiyaneke alternatîf e û got, “Dema ku min paradîgmaya Rêber Apo û aliyê wê yê avakirina alternatîfekê keşif kir, min hîs kir ku dikarim azad bibim û mirovên din jî azad bibin. Ji ber ku paşeroj di destê me de ye.”
‘SÎSTEMÊ TÊGÎNÊN AŞTÎ Û DEMOKRASIYÊ MANÎPULE KIR’
Anna R. destnîşan kir ku divê jinûve xwedî li têgînên weke aştî û demokrasiyê bê derketin ku sîstemê ji mirovan dûr xistiye û got, “Bi dîtina min divê hin têgîn jinûve bêne pejirandin; weke aştî û demokrasiyê. Ev têgîn nirxên mirovan e. Bi giştî li cîhanê û li Ewropayê sîstema hegemonîk ev nirx ji mirovan dûr xistiye. Têgînên aştî û demokrasiyê manîpule kir.”
Anna R. bal kişand ser dengvedana Pêvajoya Aştî û Civaka Demokratîk a li Ewropayê û got, “Em zanin ku li Ewropayê niha şerekî global heye. Dibe ku zehmet e li Ewropayê mirov bi vê bihese. Lê belê wateya vê ew e ku daxwazek ji bo fêhmkirina vê, lewma afirandina aştî û demokrasiyê heye.
Eger em bên ser bûyerên li Rojhilata Navîn; çavê mirovên li Ewropayê li ser rewşa li Rojhilata Navîn û Kurdistanê ye. Mirov dixwaze bibîne bê aştî û demokrasî çawa dikare bê avakirin. Bi dîtina min pêvajoya aştiyê ya li Kurdistanê ji bo gelan hemûyan firsendek gavavêtinê ya ji bo rawestandina şer e.”
‘DIVÊ EM KOMÎNAN JINÛVE BÎNIN BÎRA XWE Û BIXIN MERIYETÊ’
Anna R. diyar kir ku divê komîn jinûve bê bîra mirovan, bi cih bêne anîn û got, “Ji bo serxistina vê armancê di heman demê de divê em li dijî ezeztiyê û egoyê jî têbikoşin. Bi dîtina min dema ku me fêhm kir ku em mecbûr in vê bikin, naxwe wê azadî ji holê rabe, hingî em ê bikin. Lewma ji bo avakirina azadiyê, azadiya xwe divê em di komînê de israr bikin.”
Anna Re. li hemberî pêla faşîzmê ya salên dawî li cîhanê bilind dibe işaret bi girîngiya sosyalîzma demokratîk û têkoşîna ekolojîk û azadiya jinê kir.
‘JINÊN KURD JI BO ME HEMÛYAN MÎNAK E’
Di dewama axaftina xwe de Anna R. anî ziman ku Tevgera Jinên Kurd ji bo hemû jinên li cîhanê mînak e û diyar kir ku paradîgmaya Rêber Apo li tevahiya cîhanê çavkaniya hêviyê ye, lewma divê bê berfirehkirin.
Anna R. got, “Ji niha ve ji bo tevahiya cîhanê çavkaniya hêviyê ye, lê belê divê em israr bikin ku vê paradîgmayê belav bikin. Ji ber ku niha ji bo avakirina xweserî û azadiya mirovan yekane mînaka şênber ev e. Di heman demê de ji bo avakirina enternasyonaleke nû ya mirovên azad.”
Anna R. bang li ciwanan kir ku jinûve ji xwe bawer bikin û axaftina xwe bi van gotinan qedand: “Weke ciwan divê em jinûve ji xwe bawer bikin. Em ji xwe bawer bikin, bi civaka xwe re biryarê bidin ku jiyaneke bedew, bi rûmet û rast bijîn. Ji bo avakirina vê jiyanê divê em biryarê li ser têkoşînê bidin û vê yekê bi dîtina şoreşa Kurd pêk bîne.”
