Di sala 1992’yan de şerê ku di navbera PKK’ê, dewleta Tirk û PDK’ê de hatibû destpêkirin, bi armanca tinekirina xeta rast a azadiya gelê Kurd bû. Lê belê xeta berxwedanê ya ku bi sekna jina azad hat raberkirin, ev plan vala derxist. Gerîlayan wateya dîrokî ya vê berxwedanê û bandora wê ya li ser têkoşîna îro bi berfirehî nirxandin.
Bêrîtan Hêvî di sala 1992’yan de bi sekneke bêhempa li hemberî êrîşên hêzên hevkar PDK û dewleta Tirk li ber xwe da. Heya gulaya xwe ya dawî şer kir; ji bo ku nekeve destê dijmin çeka xwe şikand û xwe ji zinaran avêt. Ev sekin, di heman demê de vekirina rûpelekî nû ya dîroka jina azad bû. Bi şehadeta Bêrîtan Hêvî re Rêberê Gelê Kurd Abdullah Ocalan bingehê artêşbûna jin da destpêkirin. Gerîlayên YJA Star û HPG’ê, bi wesîleya salvegera şehadeta Bêrîtan Hêvî axivîn û ew bibîr anîn.
‘HEVRÊ BÊRÎTAN LI HEMBERÎ DAGIRKERAN DÎROK NIVÎSAND’
Gerîlaya YJA Starê Agirî Efrîn, diyar kir ku kesayeta Bêrîtan Hêvî ji bo wan wekî ronahiyekê ye û got: “Ez ji hevrê Bêrîtan bandor bûme û tevlî nava refên gerîla bûme. Îsal 34 saliya şehadeta hevrê Bêrîtan e. Heval Bêrîtan li hemberî dagirkeran dîrokek nivîsand. Kes nikare bi dilxwazî xwe ji zinaran biavêje, lê heval Bêrîtan ev yek bi armanc û bîreweriyeke mezin pêk anî.
Artêşa jin a ku bi pêşengiya wê hate avakirin, îro ji bo hemû jinan e. Di artêşbûna me de jin ji hemû neteweyan cihê xwe digirin. Wekî jin, em di wê biryarê de ne ku xwedî li xeta heval Bêrîtan derkevin û li hemberî êrîşên pergalê jinan biparêzin. Di şexsê hevrê Bêrîtan de em soz didin ku em ê têkoşîna azadiyê her dem bilind bikin.”
‘BÊRÎTAN XETA YEKÎTIYA NETEWEYÎ YE’
Gerîlayê HPG’ê Mordem Amed, jî bal kişand ser aliyê neteweyî yê berxwedana 1992’yan û ev nirxandin kir: “Di serî de em li hemberî bîranîna hemû şehîdên şoreşê bejna xwe ditewînin. Hevrê Bêrîtan bi çalakî û peyama ku li pey xwe hiştî, bû kesayetekî dîrokî. Dixwest romana Rêber Apo binivîse; ev yek di wan deman de armancek û lêhurbûneke pir girîng e.
Di êrîşên dewleta Tirk, PDK’ê û hêzên din de, armanc ne tenê tinekirina PKK’ê bû, di heman demê de tinekirina tevahî destkeftiyên Kurdan bû. Hevrêyên mîna Bêrîtan ev pêvajo rast fêm kirin. Îro jî pêwîst e hemû hêzên Kurd bibin yek; di vê mijarê de xeta PDK’ê ne ya rast e û divê ev yek were guhertin. Bi şahadeta hevrê Bêrîtan re bi hezaran Bêrîtan çêbûn û ev sekin ji bo me bûye nexşerê.”
‘BI HEZARAN BÊRÎTAN LI ÇIYÊ DIJÎN’
Gerîlaya YJA Starê Arjîn Xebat, jî anî ziman ku tevî ew bi rengekî fîzîkî bi Bêrîtan Hêvî re nejîne jî, bandora wê li ser her jineke azad mezin e û wiha dewam kir: “Hevrê Bêrîtan yek kes bû, lê niha bi hezaran Bêrîtan li çiyayên Kurdistanê dijîn û têdikoş in. Bêrîtan sembola şoreşa jinê ye. Bi sekna wê re dîroka jin a veşartî derket holê.
Hevrê Bêrîtan beriya şehîd bibe xwesteka dîtina Rêber Apo û nivîsandina romana wî hebû. Îro bi hezaran hevrêyên jin hene ku wê xwesteka wê pêk bînin. Soza me ya xwedîderketina li xeta heval Bêrîtan wê her dem bibe armanca me ya sereke.”
