Hevberdevkê Komîteya Têkiliyên Derve ya Wargeha Penaberan a Şehîd Rustem Cûdî (Mexmûr) Bêwar Emîn, têkildarî ambargoya ku ji aliyê Iraq û PDK’ê ve li ser Wargeha Mexmûrê tê meşandin axivî û da zanîn ku ji 17’yê Tîrmeha 2019’an ve Herêma Kurdistanê û ji 10’ê Nîsana 2025’an ve jî Hikûmeta Iraqê ambargo-rêgiriyek daniye ser wargehê û heta niha jî ev ambargo berdewame.”
‘ASTENGÎ DIDOMIN’
Bêwar Emîn, anî ziman ku di hêla jiyanî de ambargoyek li ser wargehê heye û got: “Ambargoyek ya PDK û Iraqê li ser wargeha me heye. Nasnameyên wargehê nayên nûkirin. Destûr nadin gel ku kel û pelên avahîsaziyê bînin wargehê. Her wiha pirsgirêkên perwerdê jî hene û rê nadin xwendevanên me di zanîngehan de bixwînin. Di wargehê de jî pêwistiyên perwerdê, trenduristiyê û yê şaredariyê nayên pêşwazîkirin. Astengiyan ji me re çêdikin. Gelek nexweşên kronîk li wargehê hene û astengî tên çêkirin. Gelek projeyên şaredariyê mane nîvço, rê nadin ku kel û pel bikevin wargehê.”
‘EV 30 SAL IN EM LI IRAQÊ PENABER IN’
Bêwar Emîn, da zanîn ku mafê gelê wargehê, bi awayek keyfî tê binpêkirin û wiha pêde çû: “Gelê wargehê, ne penaberên nû ne. Ev 30 sal in em li vî warî penaber in, Neteweyên Yekbûyî jî û Iraq jî me nas dikin. Lê belê niha bi awayek keyfî nêz dibin. Di serî de mijara nasnameyan, ev yek pirsgirekek cidî ye. Ji ber ku di çûyîn û hatinan de astengiyan ji me re çêdikin. Her wiha di hêla îdarî de ji me re pirsgirêk derdikevin. Ji ber ku wextê wan ser re derbas bûye û heta niha jî nehatine nûkirin.”
‘EV 5 SAL IN XWENDEVANÊN MEXMÛRÊ NIKARIN BIXWÎNIN’
Bêwar Emîn, di dirêjiya axaftinên xwe de diyarkir ku ev 5 sal in xwendevanên zanîngehê yên wargehê ji mafê xwe yê xwendinê jî bê par hatine hiştin û dom kir: “Zarokên wargehê bi keda destê dayîk û bavê xwe li wargehê 12 salan dixwînin, lê dema ku wextê zanîngehê tê nikarin bixwînin. Ev yek bandorek mezin li ciwanan dike. Xwendevanên zanîngehê neçar mane ku niha di înşatan de kar dikin. Nexweşên me hene û li gor zagonan divê hikûmet wan tedawî bike, yan jî NY’ê bibe alîkar. Lê mixabin ji astangî çêkirinê pêvetir tiştekî nakin. Ev hemû ambargoye li ser me. Gelê me ji van nêzikatiyên Iraqê ne razî ye.”
‘PÊWÎSTE BIKE EM Ê MAFÊ XWE YÊ DEMOKRATÎK BIKAR BÎNIN’
Bêwar Emîn, herî dawî bang li Iraqê kir da ku demildest dest ji van kiryarên xwe berde û wiha axaftinên xwe domand: “Ev 30 sal in em li Iraqê penaber in, heta niha jî ti pirsgirêkên gelê wargehê di hêla Iraqê de çênebûne. Gelê me yê Ereb civakek mêvanperwere, lê em dibînin ku di nava hikûmetê de hindek alî çav dide dewleta Tirk û nêzikatiyên şaş raberî me dike. Gelê wargehê gelekî berxwedêre û ti caran serî li ber ti zextan netewandiye. Pêwîst bike wê mafê xwe yê demokratîk jî bikarbîne û xwedî li mafê xwe derbikeve. Di encamê de ambargoya li ser wargehê berdewame û em bang dikin ku demildest dest ji vê şaştiyê berdin û mafê rewa yê penaberên wargehê bidin.”
