Hevserokê Giştî yê DEM Partiyê Tuncer Bakirhan li Meclîsê di komcivîna partiya xwe de axivî. Gelek Dayikên Aştiyê jî tevlî komcivînê bûn. Tuncer Bakirhan xêrhatina dayikan kir.
Bakirhan bal kişand ser Doza Kumpasê ya Kobanê û got: “Hevalên me deh sal in girtî ne. Hema bêje ji malbata her hevalek me bav, dayik, xwişk û birayên wan wefat kirin. Nikaribûn tevlî cenazeyên wan jî bibin. Divê êdî ev şerm û heya bi dawî bibe.”
Tuncer Bakirhan anî ziman ku li Tirkiyeyê li gel krîza aborî krîzek siyasî ya dijwar jî diqewime û wiha got: “Biryara ‘bêhukmiya teqez’ a li ser CHP’ê nîşaneya herî berbiçav a vê krîza siyasî ye. Ev şerm ne bes e, polîsan dişînin ser navenda CHP’ê. Ev biryara ‘bêhukmiya teqez’ ne meseleyek hiqûqî ye, eleqeya wê bi hiqûqê re nîne. Bi vê biryarê dixwazin siyaseta demokratîk bi darê zorê teşe bikin. Bila tu kes qala rêgezek din neke. Dixwazin siyaseta demokratîk bi destwerdana hiqûqî teşe bikin. Bila tu kes nebêje, ‘ev biryara darazê ye’ û gelê Tirkiyeyê pê nexapîne. Li Tirkiyeyê şahidê herî ku zêde baş vê rejîmê nas dike em in. Ev cambazî kirin e kevneşopiyek û me tu carê li vê cambaziyê mêze nekir. Ez dixwazim carek din bêjim ku em ê tu carî guh nedin vê cambaziyê.”
Tuncer Bakirhan destnîşan kir ku ew ê tu carî qebûl nekin ku bi biryarnameya darazê îradeya sindoqê were betalkirin û wiha axivî: “Kes jî nikare bi me bide qebûlkirin. Em pir bi zelalî dibêjin; ji bo me têgeha kilîda siyaseta Tirkiyeyê meşruiyeta demokratîk e. Ji ber vê yekê em vê yekê bi eşkereyî radigihînin; biryara ku Dadgeha Îstînafê daye; tenê ne partiyek siyasî hemû siyaetê û qada civaka sivîl dixe bin gefê û li ser jiyana demokratîk, mafê rêxistinbûnê û siyasetê dixwe. Bi vê biryarê re tu ewlehiya partiyên siyasî û civaka sivîl nemaye. Divê Dadgeha Bilind bicive û demildest dawî li vê ecêb û sosretê bîne. Divê li Tirkiyeyê pêşî li jiyana demokratîk û sivîl bê vekirin. Bêhiqûqî bi serdegirtina navnîşanê dest pê dike lê tu carî li şûna xwe namîne. Feraseta ku îro deriyê partiyekê dişkêne, sibê wê biçe ber deriyê hemû siyasetê.
Me vê di raboriya xwe de jî dît û tecrûbe me heye. Polîsên ku îro çûn CHP’ê, sibê wê biçin ber deriyê AKP’ê jî. Ew ê rojek jî biçin MHP, DEVA’yê, Partiya Gelecekê û Partiya Saaedetê. Jixwe her tim hatin ber deriyê me û avêtin ser avahî û malên me. Em vê bêhiqûqiyê baş nas dikin. Ew jî me baş nas dike. Ev feraset were ber deriyê me jî nikare tiştekî bigire, jixwe pergal bi xwe jî vêya dizane.”
