Serokomarê Berê yê Iraqê Dr. Berhem Salih wek Serokê Komîseriya Bilind a Kar û Barên Penaberan a Neteweyên Yekbûyî (UNHCR) bi awayek fermî dest bi karê xwe kir û diyar kir ku ewê bi hevkarên xwe re ji bo gihandin û parastina penaberan bixebitin.
Dr. Berhem Salih weke siyasetmedarekê Kurd û Serokomarê Berê yê Iraqê têkildarî wezîfedarkirina xwe ya ji bo erka xwe ya nû ya navnetewî wek Serokê Komîseriya Bilind a Kar û Barên Penaberan a Netewên Yekbûyî (UNHCR) ku ew di heman demê de dibe yek ji Cîgirên Sekreterê Giştî yê Netewên Yekbûyî li ser hesaba xwe ya taybet ya X’ê peyamek weşand.
Dr. Berhem Salih got ku wî îro wek Serokê Komîseriya Bilind a Kar û Barên Penaberan a Netewên Yekbûyî dest bi kar kiriye.
Her wisa Dr. Berhem Salih di peyama xwe de got; “Em bi hevkarên xwe re dixebitin da ku penaberan biparêzin, alîkariyê pêşkêş bikin, bi awayekî domdar pirsgirêkên penaberan, krîzên ku penaber li çaraliyê cîhanê pê re rûbirû ne û bandorê li milyonan kesan dikin, çareser bikin.”
