Li Stenbol û Enqereyê ji bo balkişandina ser rewşa girtiyên nexweş, daxuyaniyên çapemeniyê hatin dayîn. Komîsyona Girtîgehan a Şaxa Stenbolê ya Komeleya Mafên Mirovan (ÎHD), li ber avahiya komeleyê ya li Beyoglûya Stenbolê, çalakiya “Rûniştina F” ku ji bo balê bikişîne ser rewşa tenduristiyê ya girtiyên nexweş tê lidarxistin, cara 757’an pêk anî. Çalakiya vê hefteyê bal kişand ser rewşa girtiyê nexweş Mehmet Elçe (62) ku ji sedî 93 astengdar e û li Girtîgeha Girtî ya Tîpa R a Xarpêtê tê ragirtin. Gelek xizmên girtiyên nexweş û parêzvanên mafên mirovan beşdarî çalakiyê bûn. Di dema çalakiyê de pankarta “Girtiyê nexweş Mehmet Elçe berdin” hate vekirin û dirûşmeyên wekî “Girtiyên nexweş berdin” û “Tedawiya tibî mafek e; nayê astengkirin” hatin berzkirin. Endama ÎHD’ê Nîmet Tanrikulu daxuyaniya çapemeniyê xwend.
Nimet Tanrikûlûyê bi bîr xist ku salvegera Komkujiya Ulucanlar a sala 1999’an e û kesên ku di wê komkujiyê de jiyana xwe ji dest dane bi rêz bibîr anîn û wiha got: “Di salên piştre de, me şahidî kir ku bi sedan girtiyên din jiyana xwe ji dest dan, bi piranî ji ber nexweşiyê an jî di bin şert û mercên gumanbar de, mîna bûyera girtiyekî bi navê Şiyar Çîçek ku di 22’yê Îlonê de li wê hucreya ku deh roj bûn lê dihat girtin, bi awayekî gumanbar jiyana xwe ji dest da. Li gorî daneyên fermî û raporên mafên mirovan, di sala 2025’an de hezar û yek girtiyan li girtîgehan jiyana xwe ji dest dane, lê tenê ji sedî 10’ê van bûyeran ji raya giştî re hatin eşkerekirin. Berpirsên ku divê tenduristî û ewlehiya kesane misoger bikin, bi vî awayî xwe ji berpirsiyariyê dûr dixin.”
‘JI SEDÎ 93 ASTENGDAR E, NIKARE BI TENA SERÊ XWE BIJÎ’
Nîmet Tanrikûlû diyar kir ku Mehmet Elçe bi penceşêra mîdeyê ketiye û tevahiya mîdeya wî bi rêbaza cerahî hatiye derxistin û got: “Mehmet Elçe ji ber felcbûna ku ji ber xwînberbûna mêjî çêbûye, mecbûr maye ku bi kursiya bi teker tevbigere. Her wiha pişkinînên dawî derxistin holê ku rastî girtina rûvî û zivirîna rûvî jî hatiye. Li gorî gotina malbata wî, nexweşxaneya ku tedawiya wî dike raporek amade kiriye û tê de hatiye gotin ku ew ‘di şert û mercên girtîgehê de nikare bi tena serê xwe jiyana xwe bidomîne’ û lijneya tenduristiyê ya Nexweşxaneya Bajêr a Xarpêtê a Fethî Sekîn jî raporek derxistiye ku tê de astengdariya wî bi rêjeya ji sedî 93 hatiye piştrastkirin. Saziya Tiba Edlî jî raporek derxistiye ku tê de hatiye gotin Elçe ‘nikare bi tena serê xwe jiyana xwe bidomîne’, lê tevî vê yekê, li şûna ku were berdan, ew bo Girtîgeha Girtî ya Tîpa R a Xarpêtê hatiye veguhestin.”
‘LI GIRTÎGEHÊ REWŞA WÎ XIRABTIR BÛ’
Nîmet Tanrikûlû, daxuyaniya dawî ya hevjîna Elçe ragihand û got: “Dema hevjînê min hat girtin, tu pirsgirêkên wî yên tenduristiyê tune bûn. Pêşî tûşî penceşêra mîdeyê bû, piştre xwînberbûna mêjî derbas kir. Ew êdî neçar ma ku li ser kursiya bi teker bijî. Di girtîgehê de tu derfetên dermankirinê an xizmeta lênêrînê nînin. Nexweşxaneya ku ew lê dihat dermankirin raporek da û diyar kir ku ew nikare di girtîgehê de bimîne. Dema em li benda berdana wî bûn, me bihîst ku ew pêşî bo Îzmirê û piştre jî bo Girtîgeha Xarpêtê hatiye veguhestin. Rewşa wî li wir hêj xirabtir bû. Ji ber vereşîn û êşên giran, di 7’ê Îlonê de ew rakirin Nexweşxaneya Bajêr a Fethî Sekîn a Xarpêtê. Di encama kontrol û pişkinînan de, girtina rûvî û pêçîna rûvî li dora xwe hatin tespîtkirin. Doktorê wî diyar kir ku pêwîstiya wî bi emeliyatê heye, lê ev yek bi rîsk e. Her çend doktorên wî israr dikirin ku ew di bin çavdêriya wan de bimîne û digotin ku ew di wê rewşê de nikare derkeve, lê şeş roj şûnde ew ji nexweşxaneyê şandin girtîgehê. Rewşa wî her roj xirabtir dibe. Ew nikare tiştekî bixwe an jî pêdiviyên xwe yên şexsî bi cih bîne û şert û mercên xirab ên girtîgehê rewşa wî girantir dikin. Em ji ber vê yekê gelek bi fikar in. Em dixwazin ku ew demildest were berdan da ku dermankirina wî li malê bidome.”
