Dayika Aştiyê Aliye Tîmur a ku ji bo serdana xizmên xwe çibû bajarê Silêmaniyê ya Başûrê Kurdistanê krîza dil derbas kir û jiyana xwe ji dest da. Cenazeyê Dayika Aştiyê Aliye Tîmur ji Başûrê Kurdistanê şandin Colemêrgê. Ji bo Aliye Tîmur li ber avahiya DEM Partî ya Colemêrgê merasîm hat lidarxistin. Dayikên Aştiyê, parlamenter, nûnerên rêxistinên civak sivîl û bi sedan welatî tevli bûn.
Dayika Aştiyê Saadet Dogma li vir axivî, sersaxî ji malbatê re xwest û ev tişt got: “Dayika Aliye, hevaleke me ya hêja bû ku demeke dirêj di vê têkoşînê de ked dabû. Em êdî naxwazin ku tu dayik bi çavên girî jiyana xwe ji dest bide. Em dixwazin ev aştî bibe wesîle ku êdî tu dayik negrî. Êdî divê tu dayik bi êş û kulên hesreta zarokên xwe ji vê dinyayê koç neke.”
Piştî wê, Hevserokê Şaxa MEBYA-DER’ê ya Colemêrgê Yûsûf Dundar jî axaftinek kurt kir û sersaxî ji malbatê re xwest.
Piştî axaftinan, cenazeyê Aliye Tîmur bi beşdariya bi sedan kesan li goristana malbatê ya li taxa Berçelanê hat veşartin.
