Bi pêşengiya Jinên Ciwan ên Şengalê û Yekîtiya Ciwanên Êzidîxanê, bi beşdariya ciwanên ji hemû gund û navçeyên Şengalê, şehîdên berxwedana 14’ê Tîrmehê yên Zindana Amedê bi meşekê hatin bîranîn.
Meşa ciwanan bi dirûşmeya ‘Bi ruhê berxwedana 14’ê Tîrmehê weke sosyalîstekî bijî’ hate lidarxistin.
Meşa bîranînê ji gundê Kolka yê Serdeştê dest pê kir û heya bi şehîdgeha Ş Dilgeş û Ş Berxwdadn dewam kir. Ciwanan di meşê de alayên ciwanan û posterên Rêber Apo bilind kirin û bi coş dirûşmeyên “Bijî Berxwedana Zindana” û “Bijî Rêber Apo” berz kirin.
Ciwanan piştî meşa girseyî daxuyanî dan çapemeniyê. Daxuyanî ji aliyê endamê yekîtiya ciwanan Şervan Şengalî ve hat xwendin. Şengalî piştî deqeyeke rêzgirtinê ji bo ruhê şehîdan, dest bi axaftina xwe kir û got: “Em wek ciwanên Êzidî li ser esasê bîranîna şehîdên berxwedana 14’ê Tîrmehê ya Zindana Amedê meşiyane. Ji ber ku li ser xeta wê berxwedanê îro em dikarin têkoşîna xwe mezintir bikin. Çawa wan teslîmiyet li ser xwe û gelê xwe qebûl nekirin, ev xeta berxwedanê bi ruhê Kemal Pîr, Alî Çîçek û hevalên wan heya roja me ya îro didome.”
Şervan Şengalî bal kişand ser girîngiya serdema niha û got, “Serdema em tê de ne jî gelek girîng e û gavên girîng ji bo tevgera azadiyê û paşeroja gelên bindest tên avêtin. Ev jî wî ruhê berxwedanê ji her kesekî re dide diyar kirin, ku ruhê berxwedana zindana Aamedê heya niha zindî ye.”
Di dawiya daxuyaniya xwe de Şervan Şengalî anî ziman ku pêvajoya ku Rêber APO bi rê ve dibe, wê wan bigihîne serketinê û pêkanîna xewn û xeyalên şehîdan. Her wiha destnîşan kir ku ji îro pê ve tu kes nikare wan bê nasname bibîne, ji ber ku ji dema berxwedana Zindana Amedê ya 14’ê Tîrmehê heya niha, ji bo nasnameya gelan gelek bedelên giranbiha hatine dayîn.
Daxuyanî bi dirûşmeyên “Şehîd Namirin”, “Bijî Serok Apo” bi dawî bû, ku ev dirûşme ruhê berxwedan û fedakariyê nîşan dide.
Piştî daxuyaniyê, ciwanan li ser gorên şehîdan find pêxistin û bi vî awayî şehîd bi bîr anîn. Ev çalakiya bîranînê careke din nîşan da ku ciwanên Şengalê ji bo parastina nasname û hebûna xwe, li ser şopa berxwedêran berdewam in.
