Danişîna doza rojnamevanên di çarçoveya lêpirsîna Serdozgeriya Komarê ya Amedê de di 16’ê Hezîrana 2022’yan de hatin girtin û salek piştre di danişîna ewil de hatin berdan, li 4’emîn Dadgeha Cezayên Giran a Amedê hat lidarxistin. Li dosyaya 16 rojnamevan 13 mehan girtî mabûn de dosyaya 4 rojnamevanên din lê hate zêdekirin û hejmara rojnamevanên di dosyayê de tên darizandin derket 20’an. Dosyaya rojnamevan Mehmet Şahîn ji vê dosyayê hate cihêkirin û bi dosyayeke li 5’emîn Dadgeha Cezayên Giran a Amedê tê lidarxistin re kirin yek dosya. Bi vê yekê re hejmara rojnamevanan daket 19’an.
Ji rojnamevanên tên darizandin Omer Çelîk û Elîf Ungur û parêzerên wan Resûl Tamûr, Gozde Engîn û Bahar Oktay di danişînê de amade bûn. Parêzera rojnamevan Azîz Oruç Hazal Sumelî jî bi rêya SEGBÎS’ê tev li danişînê bû. Her wiha DFG, MLSA, endamên Weqfa Clooneyê ya Zanîngeha Amsterdamê û malbatên rojnamevanan jî doz şopandin.
Di dozê de ji ewil parêzer Resûl Tamûr axivî û xwest ku tevdîra kontrola edlî were rakirin û materyalên dijîtal ên rojnamevanan bên dayin.
Soydan Karaer ku li ser SEGBÎS’ê weke şahid beşdarî dozê bû jî axivî. Karaer, diyar kir ku îfadeyên wî yên têkildarî Stêrk TV’yê nayên bîra wî û nizane ka têkiliya wê bi rêxistinê re heye yan na.
Dozgeriyê jî xwest kêmasiyên di dosyayê de bên temamkirin. Şandeya dadgehê jî biryara xwe aşkera kir. Dadgehê, daxwaza rakirina kontrola edlî red kir û danişîn taloqî 18’ê Îlone kir.
