Dayikên / Mirovên Şemiyê her hefteyê li Qada Galatasarayê ji bo aqûbeta xizmên xwe yên ji aliyê dewleta Tirk ve di bin çavan de hatine windakirin û qetilkirin bipirsin û ji bo darizandina faîlan, kom dibin. Vê hefteyê çalakiya 1066’an hate lidarxistin.
Dayikên Şemiyê ku bi qurnefîl û wêneyên xizmên xwe yên winda li Qada Galatasarayê hatin ba hev, di 30’ê Tebaxê Roja Navneteweyî ya Kesên bi Zorê Hatine Windakirin de car din aqûbeta windayan pirsîn.
Di çalakiyê de ev daxwaz hatin rêzkirin:
“* Bila were eşkerekirin ka windayên me li kuderê ne, gorên wan bên dîtin, heqîqet derkeve holê.
* Bila faîl û berpirsyar bên darizandin, bêcezatî bi dawî bibe û edalet pêk were.
* Bila dewlet bi paşerojê re rû bi rû bimîne, hesab were dayîn.
* Bila ji bo astengkirina windakirinên di bin çavan de, sererastkirinên qanûnî pêk bên, mekanîzmayên bi bandor bên avakirin.”
Çalakî li Qada Galatasarayê bi danîna qurnefîlan bi dawî bû.
